༈ གཞིའི་སྐུ་གསུམ་གྱི་རྣམ་གཞག་རབ་གསལ་སྒྲོན་མེ་ཞེས་བྱ་བ་བཞུགས་སོ༎
Ref:Original Pecha was printed in 830Ad or Rablo 944 iron-dog year.

༈ ན་མོ་གུ་རུ་མཉྫུ་གྷོ་ཥཱ་ཡ། སྦྱང་གཞི་སྐྱེ་ཤི་བར་དོ་ལྕགས་ཀྱི་ཁམས། །སྦྱོང་བྱེད་ཟབ་ལམ་རིམ་གཉིས་གསེར་འགྱུར་རྩིས། །སྦྱངས་འབྲས་རྣམ་དག་སྐུ་གསུམ་རིན་ཆེན་ལ།། དབང་བསྒྱུར་ཟུང་འཇུག་མགོན་པོར་ཕྱག་འཚལ་ལོ། །འདིར་བླ་མེད་ཀྱི་ལམ་གྱིས་སྙིགས་དུས་ཀྱི་ཚེ་ཐུང་གཅིག་ལ་ཁ་སྦྱོར་ཡན་ལག་བདུན་ལྡན་གྱི་ཟུང་འཇུག་གི་སྐུ་མངོན་དུ་བྱེད་པའི་ཉེ་ལམ་ཟབ་མོ་རིམ་པ་གཉིས་ཀྱི་བགྲོད་ཚུལ་ཤེས་པ་ལ། སྦྱང་གཞི་གཞིའི་སྐུ་གསུམ་གྱི་རྣམ་གཞག་ལ་གོ་བ་ཆགས་པ་ཤིན་ཏུ་གལ་ཆེ། དེ་ན་ལམ་རིམ་པ་གཉིས་ཀྱི་སྦྱང་གཞི་སྐྱེ་ཤི་བར་དོ་གསུམ་གྱི་རྣམ་གཞག་བཤད་པ་ལ་གསུམ།

༈ འཆི་བའི་རིམ་པ་བཤད་པ།

འཆི་བའི་རིམ་པ། བར་དོ་འགྲུབ་པའི་རིམ་པ། དེས་སྐྱེས་སྲིད་དུ་སྐྱེ་བ་ལེན་པའི་ཚུལ་བཤད་པའོ། ། དང་པོ་ནི། བསྐལ་བ་དང་པོའི་འཛམ་བུ་གླིང་པའི་མི་རྣམས་རྫུས་ཏེ་སྐྱེས་པ་དང་། ཚེ་ལོ་དཔག་ཏུ་མེད་པ་ཐུབ་པ། དབང་པོ་ཀུན་ཚང་བ། ལུས་རང་འོད་ཀྱིས་ཁྱབ་པ། མཚན་དཔེ་རྗེས་མཐུན་པས་བརྒྱན་པ། ཁམ་ཟས་ལ་མི་ལྟོས་པར་དགའ་བའི་ཟས་ཟ་བ། རྫུ་འཕྲུལ་གྱིས་ནམ་མཁའ་ལ་འགྲོ་ནུས་པ་སོགས་ཆོས་བདུན་ལྡན་ཤ་སྟག་ཡིན་པ་ལ། ཁམ་ཟས་ལ་སྲེད་པའི་བག་ཆགས་སད་པའི་རྐྱེན་གྱིས་ཁམ་ཟས་རགས་པ་ཟོས་པས་སྙིགས་མ་རྣམས་བཤང་གཅིར་གྱུར་ཏེ་འདོན་པའི་སྒོ་ཕོ་མོའི་དབང་པོ་སོགས་དོད་དོ།། དེར་སྔོན་གྱི་འཁྲིག་པའི་བག་ཆགས་ལྡན་པ་གཉིས་ཀྱིས་གཅིག་ལ་གཅིག་སེམས་ཆགས་ཏེ་ལོག་པར་ཞུགས་པ་ལ་བརྟེན་ནས་མངལ་དུ་སེམས་ཅན་ཆགས་ནས་རིམ་གྱིས་མངལ་སྐྱེས་སུ་གྱུར་ཅིང་། དེ་ལ་ས་ཆུ་མེ་རླུང་ཐིག་ལེའི་ཁམས་ཏེ་དྲུག་གམ། ཡང་ན་ཕ་ལས་ཐོབ་པའི་རུས་པ་རྐང་ཁུ་བ་གསུམ་དང་། མ་ལས་ཐོབ་པའི་ཤ་པགས་པ་ཁྲག་གསུམ་ཏེ་ཁམས་དྲུག་ཚང་བ་ལ་འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་ཟེར། སྔགས་བླ་མེད་ཀྱི་ལམ་གྱི་ཐོག་མ་ནས་ཉམས་སུ་བླངས་ནས་སྙིགས་དུས་ཀྱི་ཚེ་ཐུང་གཅིག་ལ་ཚང་རྒྱ་བར་ངེས་པའི་གང་ཟག་ཡིན་ན། དེ་འདྲའི་འཛམ་བུ་གླིང་པའི་མངལ་སྐྱེས་ཁམས་དྲུག་ལྡན་ཡིན་པས་ཁྱབ་བོ།། དེའི་ལུས་ལ་རྩ་སྟོང་ཕྲག་བདུན་ཅུ་རྩ་གཉིས་རོ་རྐྱང་དབུ་མ་གསུམ་དང་བཅས་པ་ཡོད་ལ། མཐར་འཆི་བའི་ཚེ་རྩ་སྟོང་ཕྲག་བདུན་ཅུ་རྩ་གཉིས་ཀྱི་རླུང་ཐམས་ཅད་རོ་རྐྱང་གཉིས་སུ་འདུས་ཤིང་། དེ་གཉིས་ཀྱི་རླུང་ཡང་རྩ་དབུ་མ་ལ་ཐིམ། རྩ་དབུ་མའི་སྟོད་སྨད་ཀྱི་རླུང་རྣམས་ཀྱང་མཐར་སྙིང་གའི་རྩ་འདབ་ཀྱི་དྷཱུ་ཏཱིའི་ནང་གི་ཁམས་དཀར་དམར་གའུ་ཁ་སྦྱར་གྱི་ཚུལ་དུ་ཡོད་པའི་དབུས་ན་ཤིན་ཏུ་ཕྲ་བའི་རླུང་སེམས་ངོ་བོ་གཅིག་པའི་ཆ་ཤས་སྲོག་འཛིན་གྱི་རླུང་མི་ཤིགས་པ་ལ་ཐིམ་པའི་སྒོ་ནས་འཆི་དགོས་ཏེ། ལུས་ཀྱི་ཆ་ཤས་གང་ཡང་རུང་བ་ཞིག་ན་ཤིན་ཏུ་ཕྲ་བའི་རླུང་མ་གཏོགས་པའི་རྣམ་ཤེས་ཀྱི་རྟེན་བྱེད་པའི་རླུང་ཅུང་ཟད་ཅིག་གནས་ན་འཆི་བ་མི་སྲིད་པས་སོ། །དེ་ཡང་ཕུང་པོ་ལྔ་། ཁམས་བཞི། སྐྱེ་མཆེད་དྲུག ཡུལ་ལྔ་། གཞི་དུས་ཀྱི་ཡེ་ཤེས་ལྔ་སྟེ་རགས་པ་ཉེར་ལྔ་ཐིམ་པའི་སྒོ་ནས་འཆི་དགོས་ལ། ཐིམ་རིམ་ནི་དང་པོར་གཟུགས་ཕུང་གི་རིགས་ཀྱི་ཆོས་ལྔ་ནི། གཟུགས་ཀྱི་ཕུང་པོ། གཞི་དུས་ཀྱི་མེ་ལོང་ཡེ་ཤེས། སའི་ཁམས། མིག་གི་དབང་པོ། རང་རྒྱུད་ཀྱིས་བསྡུས་པའི་གཟུགས་ཏེ་ལྔ་པོ་དུས་མཉམ་དུ་ཐིམ་པར་འགྱུར་པས་དེ་རྣམས་སོ་སོའི་ཐིམ་པའི་རྟགས་ནི། གཟུགས་ཕུང་ཐིམ་པའི་ཕྱི་རྟགས་སུ་ཡན་ལག་རྣམས་སྔར་ལས་ཕྲ་རུ་འགྲོ་ཞིང་། ལུས་ཉམ་ཆུང་བ་དང་། ནུས་པ་མེད་པར་འགྱུར་རོ། །གཞི་དུས་ཀྱི་མེ་ལོང་ཡེ་ཤེས་ནི་མེ་ལོང་ལ་གཟུགས་བརྙན་སྣང་བ་བཞིན་དུ་ཡུལ་དུ་མ་ཅིག་ཅར་དུ་གསལ་བར་སྣང་བའི་ཤེས་པ་ཞིག་ལ་བཤད་ལ། དེ་ཐིམ་པའི་ཕྱི་རྟགས་སུ་མིག་མི་གསལ་ཞིང་རབ་རིབ་ཏུ་འགྱུར། སའི་ཁམས་ཐིམ་པའི་ཕྱི་རྟགས་སུ་ལུས་ཤས་ཆེར་སྐམ་ཞིང་ཡན་ལག་རྣམས་ལྷོད་ལྷོར་པོར་འགྲོ་བ་དང་། ལུས་ས་འོག་ཏུ་བྱིང་བ་ལྟ་བུའི་ཉམས་འབྱུང་། མིག་གི་དབང་པོ་ཐིམ་པའི་ཕྱི་རྟགས་སུ་མིག་འབྱེད་འཛུམ་མི་ནུས། རང་རྒྱུད་ཀྱིས་བསྡུས་པའི་གཟུགས་ཐིམ་པའི་ཕྱི་རྟགས་སུ་ལུས་ཀྱི་བཀྲག་མདངས་ཡལ་ཞིང་ཉམས་སྟོབས་ཟད་པར་འགྱུར་རོ། །དེ་རྣམས་ཀྱི་ནང་རྟགས་སུ་སྨིག་རྒྱུ་ལྟ་བུ་ཞེས་བྱ་བ་སོས་ཀའི་དུས་སུ་བྱེ་མ་ལ་ཉི་འོད་ཕོག་པ་ན་ཆུར་སྣང་བ་ལྟ་བུ་སྔོ་མེར་བའི་སྣང་བ་འབྱུང་ངོ་། །དེའི་རྗེས་སུ་ཚོར་ཕུང་གི་རིགས་ཀྱི་ཆོས་ལྔ་དུས་མཉམ་དུ་ཐིམ་སྟེ། ཚོར་ཕུང་ཐིམ་པ་ན་ཕྱི་རྟགས་སུ་དབང་ཤེས་འཁོར་གྱི་ཚོར་བ་བདེ་སྡུག་བཏང་སྙོམས་གསུམ་ལུས་ཤེས་ཀྱིས་ཉམས་སུ་མི་མྱོང་། གཞི་དུས་ཀྱི་མཉམ་ཉིད་ཡེ་ཤེས་ནི་བདེ་སྡུག་བཏང་སྙོམས་གསུམ་ཚོར་བར་རིགས་གཅིག་ཏུ་དྲན་པའི་ཤེས་པ་ལ་བཤད་ཅིང་། དེ་ཐིམ་པའི་ཕྱི་རྟགས་སུ་ཡིད་ཤེས་འཁོར་གྱི་ཚོར་བ་བདེ་སྡུག་བཏང་སྙོམས་གསུམ་མི་དྲན། ཆུའི་ཁམས་ཐིམ་པའི་ཕྱི་རྟགས་ལ། ཁ་ཆུ་དང་། རྔུལ་དང་། གཅིན་དང་། ཁྲག་དང་། ཁུ་བ་རྣམས་ཤས་ཆེར་སྐམ། རྣ་བའི་དབང་པོ་ཐིམ་པའི་ཕྱི་རྟགས་སུ་ཕྱི་ནང་གི་སྒྲ་མི་ཐོས། རང་རྒྱུད་ཀྱིས་བསྡུས་པའི་སྒྲ་ཐིམ་པའི་ཕྱི་རྟགས་སུ་རྣ་བའི་ནང་གི་འུར་སྒྲ་མི་འབྱུང་ངོ་། དེ་རྣམས་ཀྱི་ནང་རྟགས་སུ་དུ་བ་ལྟ་བུ་ཞེས་བྱ་བ་དུ་བ་འཁྲིགས་པའི་དཀྱིལ་ནས་དུར་ཁུང་ནས་དུ་བ་འབྱུང་བ་ལྟ་བུ་སྔོ་ཕོད་ཕོད་པ་ལྟ་བུའི་སྣང་བ་འཆར་རོ། །དེའི་རྗེས་སུ་འདུ་ཤེས་ཀྱི་ཕུང་པོའི་རིགས་ཀྱི་ཆོས་ལྔ་དུས་མཉམ་དུ་ཐིམ་ལ། འདུ་ཤེས་ཀྱི་ཕུང་པོ་ཐིམ་པའི་ཕྱི་རྟགས་སུ་ཕ་མ་ལ་སོགས་པའི་ཉེ་དུ་སོགས་ཀྱི་དོན་མི་དྲན། གཞི་དུས་ཀྱི་སོར་རྟོག་ཡེ་ཤེས་ནི་ཉེ་དུ་སོགས་ཀྱི་མིང་སོ་སོར་དྲན་པའི་ཤེས་པ་ལ་བཤད་ཅིང་། དེ་ཐིམ་པའི་རྟགས་སུ་ཕ་མ་ལ་སོགས་པའི་ཉེ་དུ་རྣམས་ཀྱི་མིང་མི་དྲན། མེའི་ཁམས་ཐིམ་པའི་ཕྱི་རྟགས་སུ་ལུས་ཀྱི་མེ་དྲོད་ཡལ་ནས་བཟའ་བཏུང་འཇུ་བའི་ནུས་པ་ཉམས། སྣའི་དབང་པོ་ཐིམ་པའི་ཕྱི་རྟགས་སུ་སྣ་སྒོ་ནས་རླུང་ནང་དུ་སྡུད་པ་ཞན་ཅིང་ཕྱིར་དྲག་ལ་རིང་དུ་རྒྱུ་བའི་དབུགས་བརྩེགས་མ་འབྱུང་། རང་རྒྱུད་ཀྱིས་བསྡུས་པའི་དྲི་ཐིམ་པའི་ཕྱི་རྟགས་སུ་སྣས་དྲི་ཞིམ་མི་ཞིམ་གང་ཡང་མི་ཚོར་རོ། །དེ་རྣམས་ཀྱི་ནང་རྟགས་སུ་མཁའ་སྣང་ལྟ་བུ་ཞེས་ཀྱང་བྱ། སྲིན་བུ་མེ་ཁྱེར་ལྟ་བུ་ཞེས་བྱ་བ་དུད་ཁུང་ནས་དུ་བ་སྔོ་ཕོད་ཕོད་པ་འབྱུང་བ་ལྟ་བུའི་གསེབ་ནས་མེ་སྟག་དམར་ཚིག་ཚིག་པ་ལྟ་བུའམ། ཡོས་རྔོས་པའི་སླ་ངའི་རྒྱབ་ཀྱི་དྲེག་པ་ལ་མེ་སྟག་དམར་ཡལ་ཡལ་འོང་བ་ལྟ་བུའི་སྣང་བ་འབྱུང་ངོ་། །དེའི་རྗེས་སུ་འདུ་བྱེད་ཀྱི་ཕུང་པོའི་རིགས་ཀྱི་ཆོས་ལྔ་དུས་མཉམ་དུ་ཐིམ་པར་འགྱུར་ཏེ། འདུ་བྱེད་ཀྱི་ཕུང་པོ་ཐིམ་པའི་ཕྱི་རྟགས་ལ་ལུས་ཀྱི་བྱ་བ་བསྒུལ་བསྐྱོད་སོགས་མི་ནུས། གཞི་དུས་ཀྱི་བྱ་བ་སྒྲུབ་ཡེ་ཤེས་ནི་འཇིག་རྟེན་པའི་ཕྱིའི་བྱ་བ་དང་དགོས་པ་སོགས་དྲན་པའི་ཤེས་པ་ལ་བཤད་ཅིང་། དེ་ཐིམ་པའི་ཕྱི་རྟགས་སུ་འཇིག་རྟེན་པའི་ཕྱིའི་བྱ་བ་དང་དགོས་པ་སོགས་གང་ཡང་མི་དྲན། རླུང་གི་ཁམས་ཐིམ་པའི་ཕྱི་རྟགས་སུ་སྲོག་འཛིན་སོགས་རླུང་བཅུ་རང་རང་གི་གནས་ནས་སྙིང་གར་འཕོ་ཞིང་དབུགས་ཕྱི་ནང་དུ་རྒྱུ་བ་ཆད། ལྕེའི་དབང་པོ་ཐིམ་པའི་ཕྱི་རྟགས་ལ་ལྕེ་སྦོམ་ཞིང་ཐུང་ལ་ལྕེའི་རྩ་བ་སྔོན་པོར་འགྱུར། རང་རྒྱུད་ཀྱིས་བསྡུས་པའི་རོ་ཐིམ་པའི་ཕྱི་རྟགས་སུ་ལྕེས་རོ་དྲུག་གང་ཡང་མི་མྱོང་། སྐབས་འདིར་ལུས་དབང་དང་རེག་བྱ་ཡང་ཐིམ་དགོས་པས་དེ་ཐིམ་པའི་ཕྱི་རྟགས་ལ་རེག་བྱ་འཇམ་རྩུབ་གང་ཡང་མི་མྱོང་ངོ་། །དེ་རྣམས་ཀྱི་ནང་རྟགས་སུ་མར་མེ་འབར་བ་ལྟ་བུ་ཞེས་བྱ་བ་མར་མེ་ཟད་ཀར་རྩེ་མོ་ཏ་ལ་ལ་འགྲོ་བ་ལྟ་བུའི་སྣང་བ་འབྱུང་ངོ་། །དེ་ཡང་འབྱུང་བཞི་སྔ་མ་ཕྱི་མ་ལ་ཐིམ་ཚུལ་ནི་འབྱུང་བ་སྔ་མའི་རང་རང་གི་རྣམ་ཤེས་ཀྱི་རྟེན་བྱེད་པའི་ནུས་པ་བསྡུས་ནས་ཕྱི་མའི་ནུས་པ་གསལ་དུ་སོང་བ་ལ་འབྱུང་བ་སྔ་མ་ཕྱི་མ་ལ་ཐིམ་ཞེས་བཤད་པ་ཡིན་གྱི། འབྱུང་བ་སྔ་མ་ཞིག་ཕྱི་མའི་རང་བཞིན་དུ་སོང་བ་ནི་མ་ཡིན་ཏེ། ས་ཆུ་ལ་ཐིམ་ཞེས་པས་རླུང་གིས་རྣམ་ཤེས་ཀྱི་རྟེན་བྱེད་པའི་ནུས་པ་ཉམས་ནས་ཆུ་རླུང་གིས་རྣམ་ཤེས་ཀྱི་རྟེན་བྱེད་པའི་ནུས་པ་གསལ་དུ་སོང་བས་ན། སྔ་མའི་ནུས་པ་ཕྱི་མ་ལ་འཕོས་པ་འདྲ་བ་ཞིག་འབྱུང་བས་ས་ཆུ་ལ་ཐིམ་ཞེས་བཤད་ལ། ས་རང་དགའ་བ་ཞིག་ཆུ་རང་དགའ་བ་ཞིག་ལ་ཐིམ་པ་ནི་མ་ཡིན་ནོ། །དེས་གཞན་རྣམས་ལའང་རིགས་འགྲེའོ། །འབྱུང་བཞི་ཐིམ་རྗེས་སུ་རང་བཞིན་བརྒྱད་ཅུའི་རྟོགས་པའི་སེམས། སྣང་བ་དཀར་ལམ་པའི་སེམས། མཆེད་པ་དམར་ལམ་པའི་སེམས། ཉེར་ཐོབ་ནག་ལམ་པའི་སེམས། འཆི་བ་འོད་གསལ་གྱི་སེམས་ཏེ་རྣམ་ཤེས་ཀྱི་ཕུང་པོའི་རིགས་ཀྱི་ཆོས་ལྔ་པོ་འདི་རྣམས་རིམ་ཅན་དུ་འཆར་དགོས་སོ། །རང་བཞིན་བརྒྱུད་བཅུའི་རྟོག་པའི་སེམས་དང་། དེའི་བཞོན་པར་གྱུར་པའི་རླུང་གཉིས་སྣང་བ་དཀར་ལམ་པའི་སྔ་རོལ་དུ་ཐིམ་དགོས་ཏེ། དེ་དང་སྣང་བའི་སེམས་གཉིས་འཛིན་སྟངས་མི་མཐུན་ཞིང་ཕྲ་རགས་ཀྱི་ཁྱད་པར་ཆེ་བས་སྣང་བ་རང་དུས་སུ་དེ་འདྲའི་བློ་རགས་པ་མེད་པའི་ཕྱིར། དེས་ན་རང་བཞིན་བརྒྱད་ཅུའི་ཀུན་རྟོག་བཞོན་པའི་རླུང་དང་བཅས་པ་སྣང་བ་ལ་ཐིམ་པར་རྩོམ་པའི་ཚེ་མར་མེ་འབར་བ་ལྟ་བུའི་སྣང་བ་འབྱུང་། དེ་སྣང་བ་ལ་ཐིམ་པའི་སྣང་བ་རང་དུས་ཀྱི་རྟགས་ནི་སྟོན་གྱི་ནམ་མཁའ་གཡའ་དག་པའི་ཚེ་མཚན་མོ་ཟླ་བ་ཤར་བའི་འོད་ཀྱིས་ཁྱབ་པའི་ནམ་མཁའ་ལྟ་བུ་ཤིན་ཏུ་དྭངས་ཤིང་སྟོང་སང་ངེ་བ་ལ་འོད་ཀྱི་སྣང་བ་དཀར་པོའི་རྣམ་པ་ཞིག་འཆར་ལ། དེ་ལྟར་འཆར་བའི་རྐྱེན་ནི། སྙིང་ག་ཡན་ཆད་ཀྱི་རོ་རྐྱང་གི་རླུང་ཐམས་ཅད་དབུ་མའི་ཡར་སྣ་ནས་ཞུགས་པའི་སྟོབས་ཀྱིས་སྤྱི་བོའི་རྩ་མདུད་གྲོལ་བའི་དབུས་ན་ཕ་ལས་ཐོབ་པའི་ཐིག་ལེ་དཀར་པོ་ཧཾ་ཡིག་མགོ་ཐུར་བསྟན་གྱི་རྣམ་པར་ཡོད་པ་ཆུའི་རང་བཞིན་ཅན་ཡིན་པས་ཐུར་ལ་འོངས་ཏེ། སྙིང་གའི་རོ་རྐྱང་གི་མདུད་པ་དྲུག་སྐོར་གྱི་སྟེང་དུ་སླེབ་པའི་བར་ལ་དེ་འདྲའི་སྣང་བ་འབྱུང་བ་ཡིན་གྱི། ཕྱི་རོལ་ནས་ཟླ་འོད་སོགས་ཀྱི་སྣང་བ་ཤར་བ་མ་ཡིན་ནོ། །དེ་ལ་སྣང་བ་དང་སྟོང་པ་ཞེས་བྱའོ། །དེའི་རྗེས་སུ་སྣང་བ་དང་བཞོན་པའི་རླུང་དང་བཅས་པ་མཆེད་པ་ལ་ཐིམ་ནས་མཆེད་པའི་སེམས་ཤར་བའི་ཚེ། སྟོན་གནམ་གཡའ་དག་ལ་ཉིད་འོད་ཀྱིས་ཁྱབ་པ་ལྟ་བུ་སྔར་ལས་ཀྱང་ཆེས་དྭངས་པའི་སྟོང་སང་ངེ་བ་དམར་པོའམ་དམར་སེར་གྱི་སྣང་བ་འཆར་ལ། དེའི་རྐྱེན་ནི་སྙིང་ག་མན་ཆད་ཀྱི་རོ་རྐྱང་གི་རླུང་ཐམས་ཅད་དབུ་མའི་མར་སྣ་ནས་ཞུགས་པའི་སྟོབས་ཀྱིས་ནོར་བུའི་རྩ་འཁོར་གྱི་མདུད་པ་དང་ལྟེ་བའི་རྩ་འཁོར་གྱིས་མདུད་པ་རྣམས་རིམ་གྱི་གྲོལ་པས། ལྟེ་བའི་རྩ་འཁོར་གྱི་དབུས་སུ་མ་ལས་ཐོབ་པའི་ཐིག་ལེ་དམར་པོ་ཨ་ཐུང་ཤད་ཀྱི་རྣམ་པར་ཡོད་པ་མེའི་རངབ་བཞིན་ཅན་ཡིན་པ་ཡར་འོངས་ཏེ། སྙིང་གའི་རོ་རྐྱང་གི་མདུད་པ་དྲུག་སྐོར་གྱི་འོག་ཏུ་སླེབ་པའི་བར་ལ་དེ་འདྲའི་སྣང་བ་འབྱུང་བ་ཡིན་ལ། ཕྱི་རོལ་ནས་ཉི་འོད་སོགས་ཀྱི་སྣང་བ་ཤར་བ་མ་ཡིན་ནོ། །དེ་ལ་སྣང་བ་མཆེད་པ་དང་ཤིན་ཏུ་སྟོང་པ་ཟེར་རོ། །དེའི་རྗེས་སུ་མཆེད་པ་བཞོན་པའི་རླུང་དང་བཅས་པ་ཉེར་ཐོབ་ལ་ཐིམ་པའི་ཉེར་ཐོབ་ཀྱི་སྟོད་ཀྱི་ཚེ་སྟོན་གནམ་གཡའ་དག་ལ་མཚམས་ཀྱི་སྨག་འཐུག་པོས་ཁྱབ་པ་ལྟ་བུ་སྟོང་སང་ནག་ལམ་པའི་སྣང་བ་འཆར་ལ། དེ་ནི་དབུ་མའི་ནང་གི་ཡས་རླུང་མས་རླུང་རྣམས་སྙིང་གའི་དབུ་མའི་ནང་དུ་འདུས་པའི་སྟོབས་ཀྱིས་སྙིང་གའི་རོ་རྐྱང་གི་མདུད་པ་དྲུག་སྐོར་གྲོལ་ཏེ། སྟེང་གི་ཐིག་ལ་དཀར་པོ་མར་བབ། འོག་གི་ཐིག་ལེ་དམར་པོ་ཡར་འོངས་ཏེ། སྙིང་གའི་དྷཱུ་ཏཱིའི་དབུས་ན་མི་ཤིགས་པའི་ཐིག་ལེ་དཀར་དམར་གའུ་ཁ་སྦྱར་གྱི་ཚུལ་དུ་ཡོད་པའི་དབུས་སུ་ཆུད་ནས་ཕྲད་པའི་རྐྱེན་གྱིས་དེ་འདྲའི་སྣང་བ་འབྱུང་བ་ཡིན་གྱི། ཕྱི་རོལ་ནས་མུན་པ་སོགས་ཀྱི་སྣང་བ་ཤར་བ་མ་ཡིན་ནོ། །དེ་ལ་ཉེར་ཐོབ་དང་སྟོང་པ་ཆེན་པོ་ཞེས་བྱའོ། །དེ་ཡང་ཉེར་ཐོབ་ཀྱི་སྟོད་ཡུལ་སྣང་དང་བཅས་པ་ལ་སྐྱེས་ལ། ཉེར་ཐོབ་ཀྱི་སྨད་ལ་ཡུལ་གང་ཡང་མི་དྲན་པར་དྲན་མེད་དུ་བརྒྱལ་བ་ལྟར་ནག་འཐོམས་ཀྱིས་འགྲོ། དེ་ནས་ཤིན་ཏུ་ཕྲ་བའི་རླུང་སེམས་ལས་གློ་བུར་དུ་བྱུང་བའི་རླུང་སེམས་མཐའ་དག་འགགས་ཏེ། དང་པོ་ནས་གཞི་ལ་ཡོད་པའི་ཤིན་ཏུ་ཕྲ་བའི་རླུང་སེམས་ཀྱི་དྲན་པ་མ་གསོ་བའི་བར་དེར་ཉེར་ཐོབ་ཀྱི་སྨད་དྲན་མེད་དེ་འོང་བ་ཡིན་ལ། དེའི་རྗེས་སུ་ཤིན་ཏུ་ཕྲ་བའི་རླུང་སེམས་ཀྱི་དྲན་པ་གསོས་ཏེ་འཆི་བ་འོད་གསལ་འཆར་རོ། །ཀུན་རྟོག་གཡོ་བ་དང་ཐིམ་པའི་བར་དུ་འབྱུང་ཞིང་སྟོན་གནམ་གཡའ་དག་ལ་ཟླ་འོད་ཀྱིས་ཁྱབ་པ་ལྟ་བུའི་སྟོང་སང་དཀར་ལམ་པའི་སྣང་བ་འཆར་གྱི། དེ་ལས་གཞན་པའི་གཉིས་སྣང་རགས་པ་གཞན་གང་ཡང་མི་འཆར་བའི་ཡིད་ཀྱིས་ཤེས་པ་ནི། སྣང་བ་དཀར་ལམ་པའི་མཚན་ཉིད་དང་། ཀུན་རྟོག་གཡོ་བ་དང་ཐིམ་པའི་བར་དུ་འབྱུང་ཞིང་སྟོན་གནམ་གཡའ་དག་ལ་ཉིད་འོད་ཀྱིས་ཁྱབ་པ་ལྟ་བུའི་སྟོང་སང་དམར་ལམ་པའི་སྣང་བ་འཆར་གྱི། དེ་ལས་གཞན་པའི་གཉིས་སྣང་རགས་པ་གཞན་གང་ཡང་མི་འཆར་བའི་ཡིད་ཀྱི་ཤེས་པ་ནི། སྣང་བ་མཆེད་པའི་མཚན་ཉིད། ཀུན་རྟོག་གཡོ་བ་དང་ཐིམ་པའི་བར་དུ་འབྱུང་ཞིང་སྟོན་གནམ་གཡའ་དག་ལ་མཚམས་ཀྱི་སྨག་མཐུག་པོས་ཁྱབ་པ་ལྟ་བུའི་སྟོང་སང་ནག་ལམ་པའི་སྣང་བ་འཆར་གྱི། དེ་ལས་གཞན་པའི་གཉིས་སྣང་རགས་པ་གཞན་གང་ཡང་མི་འཆར་བའི་ཡིད་ཀྱི་ཤེས་པ་ནི། སྣང་བ་ཉེར་ཐོབ་ཀྱི་མཚན་ཉིད་ཡིན་ནོ། །ཉེར་ཐོབ་འོད་གསལ་ལ་ཐིམ་ནས་འོད་གསལ་ཤར་བའི་ཚེ་ཉེར་ཐོབ་ཀྱི་སྨད་དྲན་མེད་དེ་སངས་ནས་གཉིས་སྣང་རགས་པ་ཅུང་ཟད་ཀྱང་མེད་པར་སྟོན་གྱི་ནམ་མཁའ་གཡའ་དག་པ་ལ་ཟླ་འོད་ཉིད་འོད་མུན་པ་སྟེ་སློད་བྱེད་ཀྱི་རྐྱེན་གསུམ་དང་བྲལ་བའི་ཐོ་རེངས་ཀྱི་ནམ་མཁའི་རང་མདོག་ཇི་ལྟ་བ་བཞིན་སྟོང་སང་ཤིན་ཏུ་དྭངས་པའི་སྣང་བ་སྟོང་ཉིད་མངོན་སུམ་དུ་རྟོགས་པའི་མཉམ་གཞག་གི་སྣང་བ་འདྲ་བ་ཞིག་འཆར་རོ། །དེ་ལྟར་འཆར་བའི་རྐྱེན་ཡང་ཐིག་ལེ་དཀར་དམར་གཉིས་མི་ཤིགས་པའི་ཐིག་ལེ་དཀར་དམར་ལ་ཐིམ། དབུ་མའི་ནང་གི་རླུང་ཐམས་ཅད་ཀྱང་ཤིན་ཏུ་ཕྲ་བའི་སྲོག་འཛིན་གྱི་རླུང་ལ་ཐིམ་པས་དང་པོ་ནས་གཞི་ལ་ཡོད་པའི་ཤིན་ཏུ་ཕྲ་བའི་རླུང་སེམས་མངོན་དུ་གྱུར་བས་ན་དེ་འདྲའི་སྣང་བ་ཤར་བ་ཡིན་གྱི། ཕྱི་རོལ་གྱི་ནམ་མཁའ་སྟོང་སང་སྣང་བ་མ་ཡིན་ནོ། །དེ་ལ་འཆི་བ་འོད་གསལ་དང་ཐམས་ཅད་སྟོང་པ་ཞེས་བྱ་སྟེ། འཆི་བ་དངོས་དེ་ཡིན་ནོ། །དེ་ནི་གཞིའི་སྐུ་དང་། སྟོང་སང་དེ་ལ་གཞིའི་ངོ་བོ་ཉིད་ཀྱི་སྐུ་དང་། དེ་ཡུལ་དུ་བྱེད་པའི་བློ་དེ་ལ་གཞིའི་རྟོགས་པ་ཡེ་ཤེས་ཆོས་ཀྱི་སྐུ་ཞེས་ཀྱང་ཟེར་རོ། །དེ་ལ་ཐ་མལ་བའི་མི་རྣམས་ཞག་གསུམ་གྱི་བར་དུ་གནས་ལ། དེ་ནས་ཁམས་དཀར་དམར་གྱི་རྟགས་འོང་ངོ་། །ནད་ཀྱིས་ལུས་ཟུངས་ཟད་དྲག་པ་ལ་ཞག་ཇི་ཙམ་སོང་ཡང་ཁམས་དཀར་དམར་གྱི་རྟགས་མི་འོང་པའང་སྲིད་ལ། རྣལ་འབྱོར་བས་རྟོགས་པ་མཐོ་དམའི་དབང་གིས་འོད་གསལ་དེ་ཆོས་སྐུ་དང་བསྲེས་ནས་འཇོག་པ་ལ་ཞག་གྲངས་མང་ཉུང་ངེས་པ་མེད་པར་གསུང་། སྣང་མཆེད་ཐོབ་གསུམ་འོད་གསལ་དང་བཅས་པའི་ཐིམ་ཚུལ་དེ་ཡང་སེམས་སྔ་མ་སྔ་མའི་ནུས་པ་འགགས་ནས་ཕྱི་མ་ཕྱི་མ་གསལ་དུ་སོང་བ་ལ་སྔ་མ་ཕྱི་མ་ལ་ཐིམ་ཞེས་བྱའི། སྔ་མ་ཕྱི་མའི་རང་བཞིན་དུ་སོང་བ་ནི་མ་ཡིན་ནོ། །སྟོན་གྱི་ནམ་མཁའ་དཔེར་བཟུང་བ་ནི། དབྱར་དུས་ཀྱི་ཆར་གྱིས་སའི་རྡུལ་བར་སྣང་ལ་ལྡང་བ་ལེགས་པར་མནན་པ་དང་། སྤྲིན་གྱི་སྒྲིབ་བྱེད་དང་བྲལ་བ་གཉིས་ཚོགས་ཤིན་ཏུ་དྭངས་པ་མང་དུ་འབྱུང་བ་སྟོན་གྱི་དུས་ཡིན་པས་སྟོན་དུས་ཀྱི་ནམ་མཁའ་དཔེར་བཟུང་བ་དང་། ནམ་མཁའ་དེ་ཐོགས་བཅས་རགས་པ་དགག་ཙམ་གྱི་སྟོང་སང་ཡིན་པ་ལྟར། སྟོང་པ་བཞི་པོ་ཡང་ཡིད་ངོར་ཀུན་རྟོག་རགས་པའི་སྣང་བ་ལོག་ནས་སྟོང་སང་གི་སྣང་བ་འཆར་བ་གཉིས་སྣང་ཚུལ་མཚུངས་པས་དཔེ་དོན་སྦྱར་བ་ཡིན་གྱི། གནས་སྐབས་དེ་ན་ནམ་མཁའ་སོགས་ཀྱི་སྣང་བ་ཤར་བ་མ་ཡིན་ནོ། །འོ་ན་སྣང་བའི་སྔ་རོལ་ཏུ་རང་བཞིན་བརྒྱད་ཅུ་བཞོན་པའི་རླུང་དང་བཅས་པ་ཐིམ་ཟིན་ན། སྣང་མཆེད་ཐོབ་གསུམ་གྱི་དུས་སུ་ཐིམ་རྒྱུའི་རླུང་མེད་དམ་སྙམ་ན། སྤྱིར་རླུང་ལ་ཕྲ་རགས་མང་དུ་ཡོད་པའི་རགས་པ་རྣམས་ཐིམ་ཚར་ཡང་ཕྲ་བ་ཡོད་དོ། །དེས་ན་རླུང་ཕྲ་བ་གཅིག་པུས་ཤེས་པའི་རྟེན་བྱེད་པའི་དུས་ནི་རླུང་སྣང་བ་ལ་ཐིམ་པ་ནས་ཉེར་ཐོབ་འོད་གསལ་ཐིམ་པའི་བར་དུ་ཡིན་ནོ། །སྟོང་པ་བཞིའི་སྐབས་སུ་ཤེས་པ་སྔ་མ་སྔ་མ་ཡུལ་སྣང་དང་བཅས་པ་ལས་ཕྱི་མ་ཕྱི་མ་རྣམས་ཡུལ་སྣང་དང་བཅས་ཇེ་ཕྲ་ཇེ་ཕྲར་སོང་བའི་སྟོབས་ཀྱིས་ཡིད་ངོར་ཀུན་རྫོབ་ཀྱི་སྣང་བ་རགས་པ་ལོག་ནས་སྟོང་སང་ངེ་བ་ཞིག་ཤར་བ་ཡིན་གྱི་སྟོང་ཉིད་ཡུལ་དུ་བྱེད་པ་ནི་མ་ཡིན་ནོ། །དེས་ན་ལམ་མི་བསྒོམས་པའི་ཐ་མལ་བ་ལ་དེ་དག་གི་སྐབས་སུ་བདེན་གྲུབ་ཁོ་ན་ལས་བདེན་མེད་ཀྱི་སྣང་བ་མི་འཆར་ཏེ། སྐབས་འདིའི་སྟོང་པ་བཞི་པོ་སེམས་ཅན་འཆི་ཚད་ཐམས་ཅད་ལ་འའཆར་བས་འཆི་བའི་སྐབས་སྟོང་ཉིད་རྟོགས་ན་འབད་མེད་དུ་གྲོལ་བར་ཐལ་བའི་ཕྱིར་རོ། ཐ་མལ་པ་རྣམས་ཀྱིས་འཆི་བ་འོད་གསལ་དེ་སྣང་ལ་མ་ངེས་པའི་ཚུལ་གྱིས་མྱོང་བ་ཡིན་གྱི། ངེས་ཤེས་དང་བཅས་ཏེ་མྱོང་བ་མིན་ནོ། །དེ་ནི་མའི་འོད་གསལ་ཡིན་ལ། ལམ་དུས་ཀྱི་གཉིད་དང་སད་པའི་སྐབས་སུ་བསྒོམས་སྟོབས་ཀྱིས་ཤར་བའི་འོད་གསལ་ལ་བུའི་འོད་གསལ་ཞེས་བྱ། དེ་གཉིས་འཆི་བ་འོད་གསལ་གྱི་དུས་སུ་འདྲེས་ནས་བསྒོམས་པ་ལ་འོད་གསལ་མ་བུ་འདྲེས་པ་ཞེས་ཟེར་རོ། །འོ་ན་འཆི་བ་འོད་གསལ་དེ་སྤྱིར་འོད་གསལ་མཚན་ཉིད་པ་ཡིན་ནམ་ཞེ་ན། རྣལ་འབྱོར་པས་འོད་གསལ་མ་བུ་བསྲེས་ཏེ་ལྟ་ཐོག་ཏུ་འཇོག་པ་ནི་འོད་གསལ་མཚན་ཉིད་པ་ཡིན་ཡང་། དེ་ལྟར་མ་ཡིན་པར་ཐ་མལ་པ་ལ་རང་ཤུགས་ཀྱིས་ཤར་བའི་འཆི་བ་འོད་གསལ་ནི་གཉིས་སྣང་རགས་པ་འགགས་པ་ཙམ་ལ་འོད་གསལ་ཞེས་བཏགས་པ་ཡིན་གྱི་མཚན་ཉིད་པ་མིན་ནོ། །སྤྱིར་འོད་གསལ་ལ་གཉིས་ལས། སྟོང་ཉིད་ཕྲ་མོ་ཡུལ་གྱི་འོད་གསལ་དང་། དེ་རྟོགས་པའི་ཡེ་ཤེས་ཡུལ་ཅན་གྱི་འོད་གསལ་དུ་འཇོག་གོ། འཆི་བའི་རིམ་པ་འདི་རྣམས་སྔགས་བླ་མེད་ཀྱི་བསྐྱེད་རྫོགས་གཉིས་ཀྱི་འཆི་བ་ཆོས་སྐུར་འཁྱེར་བའི་ལམ་འཁྱེར་དང་། དཔེ་དང་དོན་གྱི་འོད་གསལ་རྣམས་ཀྱི་སྦྱང་གཞིའི་གཙོ་བོ་ཡིན་པས་འདི་རྣམས་ལ་གོ་བ་ལེགས་པར་ཆགས་པ་ཤིན་ཏུ་གལ་ཆེའོ༎ ༎

༈ བར་དོ་འགྲུབ་པའི་རིམ་པ་བཤད་པ།

གཉིས་པ་བར་དོ་འགྲུབ་པའི་རིམ་པ་བཤད་པ་ནི། དེ་ལྟར་འཆི་བ་འོད་གསལ་གྱི་སེམས་དེ་གཡོ་མེད་དུ་ཅི་ཙམ་གནས་པའི་མཐར། དེའི་ངང་ནས་འདར་འཕྲིག་ཙམ་གྱིས་ཅུང་ཟད་གཡོ་བ་ཞིག་འོང་ལ། དེ་བྱུང་བའི་ཚེ་འོད་གསལ་ལས་ལྡང་བར་རྩོམ་པ་ཡིན་པས་མཚམས་དེ་ནས་ཤིན་ཏུ་ཕྲ་བའི་རླུང་སེམས་དེ་སྙིང་གའི་ཁམས་དཀར་དམར་གྱི་ཐིག་ལེ་ཁ་བཤག་ཕྱེ་བའི་ནང་ནས་ཕྱི་རོལ་ཏུ་རྒྱངས་ཏེ་ཐོན་ནས་ལུས་འདི་བོར་ཏེ། བར་དོའི་ལུས་གྲུབ་པ་ཡིན། དེ་དང་དུས་མཉམ་དུ་སྙིང་གའི་ཁམས་དཀར་པོ་ཐུར་དུ་བབས་ནས་རྟགས་ཀྱི་རྩེ་དང་། དམར་པོ་གྱེན་དུ་སོང་ནས་སྟེང་གི་སྣ་སྒོ་ནས་ཕྱིར་འབྱུང་ངོ་། དེ་ཡང་འཆི་བ་འོད་གསལ་གྱི་བཞོན་པར་གྱུར་པའི་རླུང་འོད་ཟེར་ལྔ་པ་དེ་བར་དོའི་ལུས་ཀྱི་ཉེར་ལེན་དང་སེམས་ཀྱི་ལྷན་ཅིག་བྱེད་རྐྱེན་བྱེད་ལ། འཆི་བ་འོད་གསལ་གྱི་སེམས་དེ་བར་དོའི་ལུས་ཀྱི་ལྷན་ཅིག་བྱེད་རྐྱེན་དང་སེམས་ཀྱི་ཉེར་ལེན་བྱས་པ་ལ་བརྟེན་ནས། གང་དུ་སྐྱེ་འགྱུར་གྱི་མིའི་རྣམ་པ་ཅན་གྱི་བར་དོ་རླུང་གི་ལུས་ཅན་རྣམ་སྨིན་གྱི་ཕུང་པོ་རྙིང་པ་ལས་ལོགས་སུ་ཕྱེ་བའི་ཚུལ་གྱིས་དངོས་གནས་ལ་འགྲུབ་པོ། །དེའི་ཚེ་སྣང་མཆེད་ཐོབ་གསུམ་སོགས་སྔར་བཤད་པ་ལས་གོ་རིམ་བཟློག་སྟེ་ལུགས་ལྡོག་གི་ཉེར་ཐོབ་ནག་ལམ་པ་ཤར་བ། འཆི་བ་འོད་གསལ་འགགས་པ། བར་དོ་གྲུབ་པ་རྣམས་དུས་མཉམ་ཡིན་ཏེ། མངོན་པ་གོང་འོག་དང་ས་སྡེ་སོགས་མང་པོ་ནས་འཆི་སྲིད་འགགས་པ་དང་བར་སྲིད་གྲུབ་པ་གཉིས་སྲང་མདའི་མཐོ་དམན་བཞིན་དུ་དུས་མཉམ་པར་གསུངས་ཤིང་། བར་སྲིད་རྫུས་སྐྱེས་ཡིན་པས་དབང་པོ་དང་ཡན་ལག་ཉིང་ལག་ཐམས་ཅད་ཅིག་ཅར་དུ་འགྲུབ་པའི་ཕྱིར་རོ། །བར་དོ་གྲུབ་མ་ཐག་པའི་སེམས་ནི་ལུགས་ལྡོག་གི་ཉེར་ཐོབ་ཡིན་ལ། དེ་ལས་ལུགས་ལྡོག་གི་མཆེད་པ་དང་། དེ་ལས་སྣང་བ་དང་། སྣང་བ་དེ་ལས་རང་བཞིན་བརྒྱད་ཅུའི་ཀུན་རྟོག་རྣམས་སྐྱེས་ཏེ་བར་དོ་བ་དེས་སྐྱེ་གནས་དང་དྲི་འཚོལ་སོགས་ཀྱི་ཕྱིར་དུ་མངོན་པར་རྒྱུག་པ་ཡིན་ནོ། །དེ་དག་གི་ཚེའང་སྔར་བཤད་པའི་རིམ་པ་ལས་བཟློག་སྟེ་ཉེར་ཐོབ་ནས་སྨིག་རྒྱུའི་བར་གྱི་རྟགས་རྣམས་རིམ་བཞིན་འབྱུང་། ཤ་ཁྲག་རྡོས་བཅས་སོགས་འབྱུང་ལུས་རགས་པ་སྤངས་པའི་རླུང་ཙམ་ལས་གྲུབ་པའི་ཡིད་ལུས་ཤིན་ཏུ་ཕྲ་བའི་བར་དོ་བ་དེ་ལ། གཞིའི་ལོངས་སྐུ་དང་། དྲི་ཟ་ཞེས་བྱའོ། །འོ་ན་དེ་འདྲའི་བར་དོ་ཡོད་པའི་དཔེ་ཇི་ལྟ་བུ་ཡིན་ཞེ་ན། ད་ལྟ་རང་ཅག་རྣམས་གཉིད་དུ་འགྲོ་བ་ན་གཉིད་ཀྱི་སྐབས་ཀྱི་རྟགས་བཞི་དང་སྟོང་བ་བཞི་འཆི་དུས་དང་འདྲ་བ་སྐྱེ་མ་ཙམ་རེ་ཤར་ནས་གཉིད་ཀྱི་འོད་གསལ་འཆར་ལ། དེ་ལས་ལྡང་བར་རྩོམ་པ་ན་རྨི་ལམ་གྱི་ལུས་སུ་ལྡང་བར་རྩོམ་ཞིང་། གཉིད་ཀྱི་འོད་གསལ་ལས་ལངས་པ་ན་རྨི་ལམ་གྱི་ལུས་གྲུབ་སྟེ། རྨི་ལམ་གྱི་སྐབས་ཀྱི་བྱ་བྱེད་སྣ་ཚོགས་ཤིག་བྱེད་ཅིང་། གཉིད་སད་པར་རྩོམ་པའི་ཚེ་རྨི་ལམ་གྱི་རླུང་ལུས་དེ་མེ་ལོང་ལ་ཧ་བཏབ་པ་བཞིན་མཐའ་ནས་ཡལ་ཏེ་སྙིང་གར་འདུས་ནས་ཕུང་པོ་རྙིང་པའི་སྙིང་གའི་དྷཱུ་ཏཱིའི་ནང་གི་ཤིན་ཏུ་ཕྲ་བའི་རླུང་སེམས་ངོ་བོ་དབྱེར་མེད་ལ་ཐིམ་ནས་གཉིད་སད་དེ། བྱ་བྱེད་སྣ་ཚོགས་ལ་འཇུག་པ་བཞིན་ཡིན་ནོ། །དེ་ལྟ་བུའི་བར་དོའི་ངོ་བོའི་ཁྱད་པར་ནི་དབང་པོ་ཀུན་ཚང་བ། རྫུས་སྐྱེས་ཡིན་པས་ཡན་ལག་དང་ཉིང་ལག་ཐམས་ཅད་ཅིག་ཅར་དུ་རྫོགས་པ། ཕྲ་བའི་ལུས་ཅན་ཡིན་པས་རྡོ་རྗེ་ཕ་ལམ་གྱིས་ཀྱང་གཞིག་ཏུ་མེད་པ། མའི་མངལ་ལྟ་བུའི་སྐྱེ་གནས་མ་གཏོགས་རི་རབ་སོགས་གང་ལའང་ཐོགས་པ་མེད་པ། ལས་ཀྱི་རྫུ་འཕྲུལ་གྱི་ཤུགས་ཀྱིས་སྐད་ཅིག་ལ་ཇི་ལྟར་འདོད་པ་བཞིན་འགྲོ་ནུས་ཤིང་སངས་རྒྱས་ཀྱིས་ཀྱང་དགག་པར་མི་ནུས་པའོ། །མཛོད་ལས། འགྲོ་བ་གང་གིས་བར་སྲིད་གྲུབ་ན་དེ་ལས་འགྲོ་བ་གཞན་དུ་མི་ལྡོག་པར་བཤད་ཀྱང་། ཀུན་བཏུས་ལས། གང་གི་བར་སྲིད་གྲུབ་ན་དེར་སྐྱེ་བའི་ངེས་པ་མེད་པར་འགྲོ་བ་གཞན་དུ་ལྡོག་པ་ཡོད་པར་གསུང་། འོན་ཀྱང་མངོན་པ་གོང་འོག་གཉིས་ཀའི་ལུགས་ལའང་བར་དོའི་རྟེན་ལ་དགྲ་བཅོམ་ཐོབ་པའི་བར་འདའ་བ་ཡོད་པས་མཐའ་གཅིག་ཏུ་སྐྱེ་སྲིད་ལེན་དགོས་པས་ཁྱབ་པ་ཁས་མི་ལེན་ནོ། །མིང་གི་རྣམས་གྲངས་ནི། ཡིད་ལས་བྱུང་བ་དང་། སྲིད་འཚོལ་དང་། དྲི་ཟ་དང་། སྲིད་པ་བར་མ་དང་། མངོན་པར་འགྲུབ་པའི་སྲིད་པ་ཞེས་མཛོད་ལས་བཤད་དོ། །ཚེ་ཚད་ཀྱི་ཁྱད་པར་ནི་རིང་མཐའ་ཞག་བདུན་ཡིན་ཡང་སྐྱེ་བའི་རྐྱེན་ཚོགས་ན་བར་སྲིད་གྲུབ་པའི་མོད་ལ་སྐྱེ་སྲིད་དུ་ཉིང་མཚམས་སྦྱོར་བའང་ཡོད་པས་ངེས་པ་མེད། གལ་ཏེ་ཞག་བདུན་ནས་སྐྱེ་བའི་རྐྱེན་མ་ཚོགས་ན་ཞག་བདུན་གྱི་མཐར་འཆི་ཆུང་རེ་བྱས་ཏེ་ཡང་བར་དོ་དེ་ཉིད་གྲུབ་སྟེ་གནས་སོ། །དེ་ལྟར་བྱས་ཏེ་ཞག་བདུན་ཕྲག་བདུན་འདས་པ་ན་ངེས་པར་སྐྱེ་བའི་རྐྱེན་ཚོགས་ཏེ་སྐྱེ་སྲིད་ལེན་པས་ཁྱབ་པར་སའི་དངོས་གཞིར་གསུངས་སོ། །ཞག་བདུན་གྱི་མཐར་འཆི་ཆུང་རེ་བྱེད་ཚུལ་ནི། བར་དོའི་རླུང་ལུས་དེ་མེ་ལོང་ལ་ཧ་བཏབ་པ་མཐའ་ནས་སྡུད་པ་བཞིན་སྟོད་སྨད་ནས་རིམ་གྱིས་སྙིང་གར་འདུས་ཏེ་བར་དོའི་གནས་སྐབས་ཀྱི་རང་བཞིན་བརྒྱུད་ཅུའི་རྟོག་པ་བཞོན་པའི་རླུང་དང་བཅས་པ་ཐིམ་ནས། བར་དོ་འཆི་བའི་རྟགས་བཞི་དང་སྟོང་པ་བཞི་སྐྱེ་མ་ཙམ་རེ་མྱུར་པའི་ཚུལ་གྱིས་ཤར་ནས་བར་དོ་ཤི་བའི་འོད་གསལ་མངོན་དུ་བྱས། དེ་ནས་འོད་གསལ་དེའི་བཞོན་པའི་རླུང་གིས་ཉེར་ལེན་བྱས་ནས་ལུགས་ལྡོག་ཏུ་ལངས་པའི་ཉེར་ཐོབ་གྲུབ་པ་དང་དུས་མཉམ་དུ་བར་དོའི་རླུང་ལུས་སྔར་བཞིན་གྲུབ་པ་ཡིན་ནོ། །བར་དོའི་རྟེན་ལ་འཆི་ཆུང་ཇི་ཙམ་བྱས་ཀྱང་བར་སྲིད་རང་ལ་བསྡུ་ལ། བར་དོ་བ་དེས་རང་གི་སྔ་མའི་ལུས་རྟེན་མཐོང་ཡང་ལས་ཀྱི་འབྲེལ་བ་ཆད་པའི་སྟོབས་ཀྱིས་ལུས་རྟེན་རྙིང་བ་དེ་ངའི་ལུས་ཡིན་སྙམ་པ་དང་དེ་ལ་འཇུག་འདོད་ཀྱི་བློ་མི་སྐྱེ་བར་སའི་དངོས་གཞི་ལས་གསུང་། ཁག་ཅིག །བར་དོའི་ཚེ་ཚད་ཞག་བདུན་དུ་གསུངས་པ་དེ་རིགས་དྲུག་རང་རང་གི་ཞག་གི་དབང་དུ་བྱས་པ་ཡིན་ཟེར་བ་མི་འཐད་དེ། དེ་ལྟར་ན་དམྱལ་བ་པ་དང་ཁམས་གོང་མའི་ལྷ་རྣམས་ཀྱི་བར་དོ་ལ་འགྲོ་བ་དེ་དང་དེའི་ཞག་བདུན་སོགས་ཀྱི་བར་དུ་གནས་པ་ཞིག་ཡོད་དགོས་པས་ལོ་བྱེ་བ་ཕྲག་ཤིན་ཏུ་མང་པོའི་བར་དུ་ཡང་སྐྱེ་བའི་རྐྱེན་མི་འཚོགས་པར་བར་དོར་གནས་པ་ཞིག་ཁས་ལེན་དགོས་པས་ཐལ་ཆེར་བར་འགྱུར་བའི་ཕྱིར་རོ། །སྲིད་པ་འཕོ་ཚུལ་གྱི་ཁྱད་པར་ནི། དམྱལ་བར་སྐྱེ་ན་བཤང་ལམ་ནས་འཕོ་ལ། ཡི་དྭགས་སུ་སྐྱེ་ན་ཁ་དང་། དུད་འགྲོར་སྐྱེ་ན་དྲི་ཆུའི་ལམ་དང་། མིར་སྐྱེ་ན་མིག་དང་། འོད་ལྟར་སྐྱེ་ན་ལྟེ་བ། གནོད་སྦྱིན་དུ་སྐྱེ་ན་སྣ། གྲུབ་པའི་ལྷ་དང་མིའམ་ཅིར་སྐྱེ་ན་རྣ་བ། གཟུགས་ཁམས་སུ་སྐྱེ་ན་སྨིན་མཚམས་ཀྱི་དབུས། གཟུགས་མེད་དུ་སྐྱེ་ན་སྤྱི་བོ་ནས་འཕོ་བར་རྒྱུད་བརྟག་པ་བརྒྱད་པ་སོགས་ལས་བཤད། འོ་ན། ས་སྡེ་སོགས་སུ་ལུས་འདོར་བ་ན་སྙིང་ག་ནས་རྣམ་ཤེས་འཕོ་བར་བཤད་པ་དང་འགལ་ལོ་ཞེ་ན། མི་འགལ་ཏེ་ལུས་ཀྱི་ནང་དུ་རྣམ་ཤེས་འཕོ་བ་ན་ཐོག་མར་སྙིང་ག་ནས་འཕོ་བ་ཡིན་ཡང་། དེ་ནས་ལུས་ཀྱི་ཕྱི་རོལ་ཏུ་འཕོ་བ་ན་སྒོ་སོ་སོ་ནས་འཕོ་བར་བཤད་པ་བཞིན་ཡིན་པའི་ཕྱིར། ཡང་མཛོད་ལས། རིམ་གྱིས་འཆི་ན་རྐང་བ་དང་། ལྟེ་བ་སྙིང་གར་ཡིད་འཆི་འཕོ། ཞེས་དང་། འགྲེལ་བར་ངན་སོང་དུ་སྐྱེ་ན་རྐང་བ་དང་། མིར་སྐྱེ་ན་ལྟེ་བ་དང་། ལྷར་སྐྱེ་བ་དང་དགྲ་བཅོམ་པ་འཆི་ན་སྙིང་གར་རྣམ་ཤེས་འགག་གོ། །ཞེས་གསུངས་པ་ཇི་ལྟར་ཡིན་སྙམ་ན། དེ་ནི་གནས་དེ་དག་ཏུ་ཡིད་འགགས་པའི་དོན་དུ་འགྲེལ་བ་ལས་བཤད་པ་ལྟར། རྐང་པ་ལ་སོགས་པའི་གནས་དེ་དག་ཏུ་ལུས་དབང་འགགས་པའི་སྟོབས་ཀྱིས་ཡིད་ཀྱི་རྣམ་ཤེས་འགགས་ཚུལ་སོ་སོ་བ་སྟོན་པ་ཙམ་ཡིན་གྱི། གནས་དེ་དག་ནས་རྣམ་ཤེས་ཕྱི་རོལ་ཏུ་འཕོ་བར་སྟོན་པ་མ་ཡིན་པས་སྔར་བཤད་པ་དང་འགལ་བ་མེད་དོ། །མཐོང་ཚུལ་གྱི་ཁྱད་པར་ནི་བར་དོ་རིགས་མཐུན་དང་ལྷའི་མིག་རྣམ་པར་དག་པས་མཐོང་བར་མཛོད་ལས་བཤད། དེ་ལ་ལྷའི་མིག་སྐྱེས་སྟོབས་ཀྱིས་ཐོབ་པ་ནི་མ་དག་པ་དང་། བསྒོམས་སྟོབས་ཀྱིས་ཐོབ་པ་ནི་ལྷའི་མིག་དག་པ་ལ་འཇོག་གོ །བར་དོ་གོང་མ་གོང་མས་འོག་མ་འོག་མ་མཐོང་བའི་ལུགས་ཀྱང་མཛོད་འགྲེལ་ལས་བཤད། བོང་ཚོད་ཀྱི་ཁྱད་པར་ནི། འཛམ་བུ་གླིང་པའི་མིའི་བར་དོ་བྱིས་པ་ལོ་ལྔའམ་དྲུག་ལོན་པ་ལྟ་བུར་མཛོད་འགྲེལ་དུ་བཤད་ཀྱང་མཐའ་གཅིག་ཏུ་ངེས་པ་ཅན་མ་གསུངས་སོ། །རྣམ་པའི་ཁྱད་པར་ནི། ངན་འགྲོའི་བར་དོ་ཕྱར་བ་ནག་པོ་བརྐྱང་བའམ་མཚན་མོ་མུན་ནག་གིས་ཁྱབ་པ་ལྟ་བུ་དང་། བདེ་འགྲོའི་བར་སྲིད་སྣམ་བུ་དཀར་པོ་བརྐྱང་པའམ་མཚན་མོ་ཟླ་འོད་ཀྱིས་ཁྱབ་པ་ལྟ་བུའི་ཉམས་འབྱུང་བར་སའི་དངོས་གཞིར་གསུངས། ཁ་དོག་གི་ཁྱད་པར་ནི། དམྱལ་བའི་བར་དོ་སྡོང་དུམ་མེས་ཚིག་པ་ལྟ་བུ་དང་། ཡི་དྭགས་ཀྱི་བར་དོ་ཆུ་ལྟ་བུ། དུད་འགྲོའི་བར་དོ་དུ་བ་ལྟ་བུ། འདོད་པའི་ལྷ་མིའི་བར་དོ་གསེར་ལྟ་བུ། གཟུགས་ཁམས་པའི་བར་དོ་དཀར་པོ་སོགས་སུ་དགའ་བོ་མངལ་འཇུག་གི་མདོ་ལས་བཤད། བྱད་གཟུགས་ཀྱི་ཁྱད་པར་ནི། གང་དུ་སྐྱེ་འགྱུར་གྱི་འགྲོ་བ་དེའི་སྔོན་དུས་ཀྱི་སྲིད་པའི་ཤ་ཚུགས་ཅན་ནམ་ལུས་དབྱིབས་ཅན་ཡིན་པར་མཛོད་ལས་གསུངས་ཤིང་། སྲིད་པ་བཞི་ནི། སྐྱེ་སྲིད་དུ་ཉིང་མཚམས་སྦྱར་བའི་སྐད་ཅིག་དང་པོ་སྐྱེ་སྲིད་དང་། དེའི་སྐད་ཅིག་གཉིས་པ་ནས་འཆི་སྲིད་མ་གྲུབ་པའི་བར་གྱི་སྲིད་པ་ནི་སྔོན་དུས་ཀྱི་སྲིད་པ་དང་། འཆི་བའི་སྐད་ཅིག་ཐ་མའམ་འཆི་བ་འོད་གསལ་ཉམས་སུ་མྱོང་བའི་དུས་ཀྱི་སྲིད་པ་ནི་འཆི་སྲིད་དང་། འཆི་སྲིད་དང་སྐྱེ་སྲིད་གཉིས་ཀྱི་བར་དུ་བྱུང་བའི་སྲིད་པ་ནི་བར་སྲིད་དོ། །སྔོན་དུས་ཀྱི་སྲིད་པ་ཞེས་པའི་ཚིག་ཙམ་ལ་འཁྲུལ་ནས་བར་དོ་བ་དེ་སྐྱེ་བ་སྔ་མའི་ལུས་ཀྱི་རྣམ་པ་ཅན་དུ་འདོད་པ་དང་། ཡང་ཕྱི་མའི་ལུས་ཀྱི་དབྱིབས་ཅན་དུ་བཤད་པ་མཐོང་ནས་ཞག་ཕྱེད་དང་བཞི་སྐྱེ་བ་སྔ་མ་དང་། ཕྱེ་དང་བཞི་སྐྱེ་བ་ཕྱི་མའི་ལུས་ཀྱི་རྣམ་པ་ཅན་དུ་འདོད་པ་ནི་ཁུངས་རྣམ་དག་གང་ཡང་མེད་པའི་སྒྲོ་བཏགས་ཁོ་ནར་ལམ་རིམ་ཆེན་མོར་གསུང་། དེས་ན་སྔོན་དུས་ཀྱི་སྲིད་པ་ཞེས་པའི་སྔོན་ནི་ཚེ་ཕྱི་མའི་འཆི་སྲིད་ལ་ལྟོས་པའི་སྔོན་ཡིན་གྱི་བར་དོ་ལ་ལྟོས་པའི་སྔོན་དུ་འཇོག་པ་མ་ཡིན་ནོ། །མཛོད་ལས་ཀྱང་། སྔོན་དུས་སྲིད་འབྱུང་ཤ་ཚུགས་ཅན། ཞེས་པའི་འབྱུང་ཞེས་པ་ནི་མ་འོངས་པའི་ཚིག་ཡིན་གྱི་འདས་ཚིག་མ་ཡིན་པའི་ཕྱིར་རོ། །ཡང་གང་དུ་སྐྱེ་འགྱུར་གྱི་སེམས་ཅན་དེའི་རྣམ་པ་ཅན་དུ་བཤད་པ་ལ། འགའ་ཞིག་གིས་དེ་ལྟ་ན་དབང་པོ་མ་ཚང་བའི་འགྲོ་བ་དེའི་བར་དོ་བ་ཡང་དབང་པོ་མ་ཚང་བར་སྨྲ་བ་ནི་ཆེས་མི་འཐད་དེ། སྐྱེ་གནས་སུ་སྐྱེ་བའི་འོག་ཏུ་མིག་སོགས་དབང་པོ་མ་ཚང་བ་འབྱུང་གི་བར་དོ་ལ་དབང་པོ་མ་ཚང་བ་གང་ནས་ཀྱང་མ་བཤད་པའི་ཕྱིར་དང་། རང་ཉིད་གང་དུ་སྐྱེ་འགྱུར་གྱི་འགྲོ་བའི་རྣམ་པ་ཅན་དུ་བཤད་པ་ཙམ་གྱིས་ཆ་ཀུན་ནས་འདྲ་བ་དགོས་ན་ཧ་ཅང་ཐལ་ཆེ་བར་འགྱུར་རོ། །བར་དོའི་འགྲོ་ཚུལ་གྱི་ཁྱད་པར་ནི། ལྷའི་བར་དོ་གྱེན་དང་། མིའི་བར་དོ་ཐད་ཀ་དང་། ངན་འགྲོའི་བར་དོ་སྤྱི་བོ་ཐུར་དུ་ཚུགས་ནས་འགྲོ་བར་སའི་དངོས་གཞིར་ལས་གསུང་། དེ་ཡང་འདོད་གཟུགས་གཉིས་སུ་སྐྱེ་བ་ལ་བར་དོ་བརྒྱུད་དགོས་པས་ཡར་གྱི་མཚམས་མེད་ཀྱི་ལས་དང་མར་གྱི་མཚམས་མེད་གཉིས་ལ་བར་དོ་མེད་པར་འདོད་པ་མི་འཐད་པར་ལམ་རིམ་ཆེན་མོར་གསུང་ལ། གཟུགས་མེད་དུ་སྐྱེ་བ་ལ་བར་དོ་མེད་དེ་གང་དུ་ཤི་འཕོས་པའི་གནས་དེ་ཉིད་དུ་གཟུགས་མེད་ཀྱི་མིང་གཞིའི་ཕུང་པོ་འགྲུབ་པོ། །དེ་ན་གཟུགས་མེད་ཁམས་སུ་སྐྱེ་འགྱུར་གྱི་གང་ཟག་དེས་འཆི་བ་འོད་གསལ་གྱི་ངང་ནས་གཟུགས་མེད་ཀྱི་ཏིང་ངེ་འཛིན་མངོན་དུ་བྱེད་ཀྱི་འཆི་བ་འོད་གསལ་ལས་ལུགས་ལྡོག་ཏུ་ལངས་པའི་ཉེར་ཐོབ་ཀྱི་སེམས་མི་འཆར་ཏེ། དེ་འདྲའི་ཉེར་ཐོབ་ཀྱི་སེམས་ནི་བར་དོའི་སེམས་ཡིན་པའི་ཕྱིར་རོ། །གཟུགས་མེད་ལ་འདོད་གཟུགས་གཉིས་ལས་གཞན་དུ་གནས་ལོགས་པ་མེད་དོ། །བར་དོ་ཁྱད་པར་བ་སྐྱེ་བ་གཅིག་གིས་ཐོགས་པའི་བྱང་སེམས་དགའ་ལྡན་ནས་འཕོས་ནས་ཡུམ་གྱི་ལྷུམས་སུ་ཞུ་འཇུག་པའི་བར་དོ་ནི། གཞོན་ནུ་མཚན་དཔེས་བརྒྱན་པ། འོད་ཀྱི་གླིང་གཞི་བྱེ་བ་ཕྲག་བརྒྱ་གསལ་བར་བྱེད་པར་མཛོད་འགྲེལ་དང་རྣམ་བཞག་རིམ་པར་གསུང་ལ། འོ་ན་བཙུན་པ་ཆོས་ལྡན་རབ་འབྱོར་གྱིས། གླང་པོ་ཆེ་དཀར་པོ་མཆེ་བ་དྲུག་ལྡན་གྱི་རྣམ་པས་ལྷུམས་སུ་ཞུགས་པར་བཤད་པ་དང་འགལ་ལོ་ཞེ་ན། དེའི་བཤད་པ་ལྟར་ཁས་ལེན་དགོས་པའང་མིན་ལ། འོན་ཀྱང་དེའི་ཡུམ་གྱི་རྨི་ལམ་དང་མཐུན་པར་བསྟན་པ་ཙམ་ཡིན་གྱི། མིར་སྐྱེ་འགྱུར་གྱི་བར་དོ་དུད་འགྲོའི་རྣམ་པ་ཅན་འདོད་ན་བསྟན་བཅོས་ཚད་ལྡན་མང་པོ་དང་འགལ་བའི་ཕྱིར། དེ་ནི་ཐེག་དམན་གྱི་ལུགས་ལ་སྒྲ་ཇི་བཞིན་པ་དང་། ཐེག་ཆེན་གྱི་ལུགས་ལ་ཚུལ་བསྟན་ཙམ་དུ་ཁས་ལེན་ནོ། །བར་དོའི་རྣམ་བཞག་འདི་དག་བླ་མེད་ཀྱི་བསྐྱེད་རིམ་གྱི་བར་དོ་ལོངས་སྐུར་འཁྱེར་བའི་ལམ་འཁྱེར་དང་། དག་མ་དག་གི་སྒྱུ་ལུས་ཀྱི་སྦྱང་གཞི་ཡིན་པས་ཞིབ་ཏུ་ཤེས་པ་གལ་ཆེའོ༎ ༎

༈ དེས་སྐྱེ་སྲིད་དུ་སྐྱེ་བ་ལེན་པའི་ཚུལ་བཤད་པ།

གསུམ་པ་དེས་སྐྱེ་གནས་སུ་སྐྱེ་བ་ལེན་པའི་ཚུལ་ནི། དེ་ཡང་བར་དོ་བ་དེས་མའི་མངལ་དུ་སྐྱེ་བ་ལེན་པ་ལ། གནས་གསུམ་མངོན་དུ་གྱུར་ཅིང་ཉེས་པ་གསུམ་དང་བྲལ་བ་ཞིག་དགོས་ཏེ། མ་ནད་མེད་ཅིང་ཟླ་མཚན་གྱི་ཁྲག་དང་ལྡན་པའི་སྐབས་ཡིན་པ། དྲི་ཟ་ཉེ་བར་འཁོར་ཞིང་འཇུག་འདོད་པ། ཕོ་མོ་གཉིས་ཕན་ཚུན་ཆགས་ཤིང་ཕྲད་པ་སྟེ་གནས་གསུམ་མངོན་དུ་གྱུར་པ་དང་། མའི་མངལ་གྱི་དབུས་ནས་ཀྱི་དབྱིབས་དང་འདྲ་བ་དང་། གྲོག་མོའི་རྐེད་པ་དང་། རྔ་མོང་གི་ཁ་ལྟ་བུ་དང་། རླུང་མཁྲིས་བད་ཀན་གསུམ་གྱིས་བཀག་པ་སྟེ་མངལ་གྱི་ཉེས་པ་དང་། ཕ་མ་གཉིས་གང་རུང་ལས་ཁུ་ཁྲག་མ་བྱུང་བའམ་བྱུང་ཡང་སྔ་ཕྱིར་འབབ་པ་དང་། དུས་མཉམ་དུ་བབས་ཀྱང་གང་རུང་ཞིག་རུལ་བ་སྟེ་ས་བོན་གྱི་ཉེས་པ་དང་། དྲི་ཟ་དེས་ཕོ་མོ་གཉིས་ཀྱི་བུར་སྐྱེ་བའི་ལས་མ་བསགས་པའམ། ཕོ་མོ་གཉིས་དེའི་ཕ་མར་འགྱུར་བའི་ལས་མ་བསགས་པ་ལས་ཀྱི་ཉེས་པ་སྟེ་ཉེས་པ་གསུམ་དང་བྲལ་བ་དགོས་པར་མངལ་འཇུག་གི་མདོ་ལས་གསུངས་ལ། འདུལ་བ་ལུང་ལས་གནས་དྲུག་མངོན་དུ་གྱུར་དགོས་པར་གསུངས་པ་ཡང་དོན་འདྲའོ།། དེ་ལྟར་མངལ་དུ་སྐྱེ་བ་ལེན་པའི་མཐུན་རྐྱེན་གསུམ་ཚང་ཞིང་འགལ་རྐྱེན་གསུམ་དང་བྲལ་བའི་དྲི་ཟ་དེས། ཕ་མ་གཉིས་ཉལ་པོ་བྱེད་པ་སྒྱུ་མ་བཞིན་དུ་མཐོང་སྟེ་འཁྲིག་པ་སྤྱོད་པར་འདོད་པའི་དབང་གིས་ཕོར་སྐྱེ་ན་མ་ལ་ཆགས་ཤིང་ཕ་ལ་འབྲལ་འདོད་དང་། མོར་སྐྱེ་ན་ཕ་ལ་ཆགས་ཤིང་མ་ལ་འབྲལ་འདོད་སྐྱེ་ལ། དེ་ནས་གང་ལ་ཆགས་པ་དེ་ལ་འཁྱུད་པར་རྩོམ་པ་ན། ལས་ཀྱི་དབང་གིས་ལུས་གཞན་གང་ཡང་མི་སྣང་བར་ཕོ་མོ་གང་ཡིན་དེའི་མཚན་མ་ཙམ་སྣང་བས་ཁོང་ཁྲོ་སྐྱེས་ཏེ་ཆགས་སྡང་གཉིས་ཀྱིས་འཆི་རྐྱེན་བྱས་ནས་མངལ་དུ་འཇུག་གོ །དྲི་ཟ་དེས་ཕ་མ་གཉིས་ཉལ་པོ་བྱེད་པ་མེད་བཞིན་དུ་ཁུ་ཁྲག་ལ་འཁྲུལ་ནས་ཉལ་པོ་བྱེད་པར་མཐོང་བར་ས་མང་པོ་པ་ལས་གསུངས་ཤིང་། མཛོད་འགྲེལ་དུ་ཕ་མ་ཉལ་པོ་བྱེད་པ་མཐོང་བར་ཡང་བཤད་དོ། །དེ་ཡང་ཕོ་མོ་གཉིས་སྙོམས་འཇུག་བྱས་པ་ན་དབང་པོ་གཉིས་བསྲུབས་པའི་སྟོབས་ཀྱིས་ཐུར་སེལ་གྱི་རླུང་གྱེན་དུ་གཡོས་ཏེ་སུམ་མདོའི་གཏུམ་མོ་ཕལ་བ་རྣམས་སྤར་བའི་དྲོད་ཀྱིས་ཐིག་ལེ་དཀར་དམར་ཞུ་བ་རྣམས་རྩ་སྟོང་ཕྲག་བདུན་ཅུ་རྩ་གཉིས་ཀྱི་སྦུབས་སྟོང་རྣམས་ནས་བབས་པས་ལུས་སེམས་བདེ་བས་ཚིམ་ཞིང་སྐབས་དེར་ཆགས་པ་དྲག་པོའི་སྐབས་སུ་བབ་པ་ན། མཇུག་ཏུ་ཁུ་བ་སྐ་བ་རེ་འབྱུང་ལ། དེ་རྗེའི་སུ་ཕ་མ་གཉིས་ཀ་ལས་ཁུ་ཁྲག་གི་ཐིག་པ་རེ་ངེས་པར་དུ་འབྱུང་བ་དེ་མའི་སྐྱེ་གནས་སུ་འདྲེས་ནས་འོ་མ་སྐོལ་བའི་སྤྲིས་མ་ཆགས་པ་ལྟར་ཡོད་པའི་དབུས་སུ་བར་དོ་ཤི་བའི་རྣམ་ཤེས་འཇུག་ལ། དེའི་ཚུལ་ནི་ཐོག་མར་བར་དོ་ཕའི་ཁའམ་སྤྱི་བོ་དང་མའི་སྐྱེ་གནས་ཀྱི་སྒོ་གསུམ་པོ་གང་རུང་ནས་ཞུགས། རྩ་སྟོང་ཕྲག་དོན་གཉིས་ཀྱི་ནང་ནས་བབས་པའི་ཐིག་ལེ་དང་འགྲོགས་ཏེ་བར་དོའི་གནས་སྐབས་ཀྱི་ཀུན་རྟོག་གཡོ་བའི་རླུང་རྣམས་ཐིམ་ནས་སྣང་མཆེད་ཐོབ་གསུམ་རིམ་བཞིན་ཤར། བར་དོ་འཆི་བའི་འོད་གསལ་རྣམས་སྔར་ལུས་རགས་པ་དོར་བའི་སྐབས་སུ་བཤད་པ་ལས་ཡུན་ཐུང་བ་སྐྱེ་མ་ཙམ་རེ་མྱུར་བའི་ཚུལ་གྱིས་འཆར་ལ། དེའི་ཚེ་སྨིག་རྒྱུ་ནས་འོད་གསལ་གྱི་བར་གྱི་རྟགས་རྣམས་འབྱུང་ཞིང་འོད་གསལ་དེའི་རིགས་འདྲ་ཕྱི་མ་ཞིག་གིས་ཁུ་ཁྲག་འདྲེས་པའི་དབུས་སུ་ཉིང་མཚམས་སྦྱར་ནས་སྐྱེ་བ་བླངས་པ་དང་ལུགས་ལྡོག་གི་ཉེར་ཐོབ་གྲུབ་པ་དུས་མཉམ། ཉེར་ཐོབ་ཀྱི་སེམས་སྐད་ཅིག་དང་པོ་དེ་ནི་སྐྱེ་བའི་སྲིད་པ་ཞེས་ཐ་སྙད་འདོགས་པའི་གཞི་དང་། སྐྱེ་གནས་སུ་དང་པོར་ཉིང་མཚམས་སྦྱར་བའི་སེམས་ཡིན་ལ། དེ་ལས་ཉེར་ཐོབ་སྐད་ཅིག་གཉིས་པ་མན་དང་། དེ་ལས་མཆེད་པ་དང་། དེ་ལས་སྣང་བ་དང་། སྣང་བ་ལས་རང་བཞིན་བརྒྱད་ཅུའི་ཀུན་རྟོགས་རྣམས་བཞོན་པའི་རླུང་དང་བཅས་པ་སྐྱེ་ཞིང་། སྣང་བའི་བཞོན་པའི་རླུང་ལས་རྣམ་ཤེས་ཀྱི་རྟེན་བྱེད་པའི་ནུས་པ་ཁྱད་པར་ཅན་དུ་གྱུར་པའི་རླུང་སྐྱེ། དེ་ལས་དེ་འདྲའི་ནུས་པ་ཁྱད་པར་ཅན་དུ་གྱུར་པའི་མེའི་ཁམས་དང་། དེ་ལས་དེ་འདྲའི་ནུས་པ་ཅན་གྱི་ཆུའི་ཁམས་དང་། དེ་ལས་དེ་འདྲའི་ནུས་པ་ཅན་གྱི་སའི་ཁམས་རྣམ་རིམ་གྱིས་སྐྱེའོ། །བར་དོ་སྒོ་གང་ནས་མངལ་དུ་འཇུག་པ་ནི། རྣམ་གཞག་རིམ་པར་རྣམ་སྣང་གི་སྒོ་སྤྱི་བོ་ནས་འཇུག་པར་བཤད་ལ། སྡོམ་འབྱུང་དང་རྡོ་རྗེ་ཕྲེང་བ་གཉིས་སུ་ཕའི་ཁ་ནས་འཇུག་པར་བཤད་པས་ན། ཐོག་མར་བར་དོ་ཕའི་ཁ་འམ་སྤྱི་བོ་ནས་ཞུགས་ཏེ་ཕའི་གསང་གནས་ནས་འཐོན། མའི་པདྨར་ཞུགས་ནས་མངལ་དུ་ཁུ་ཁྲག་གི་དབུས་སུ་བར་དོ་ཤི་བའི་རྣམ་ཤེས་ཉིང་མཚམས་སྦྱོར་བ་ཡིན་ནོ། །མཛོད་འགྲེལ་ལས། མའི་སྐྱེ་གནས་ཀྱི་སྒོ་ནས་འཇུག་པར་བཤད་པས། དེ་ལྟར་ན་མའི་སྐྱེ་གནས་ཀྱི་སྒོ་དང་། ཕའི་ཁ་དང་སྤྱི་བོ་སྟེ་མངལ་དུ་འཇུག་པའི་སྒོ་གསུམ་ཡོད་པར་ཤེས་པར་བྱའོ། །འདི་ནི་མངལ་སྐྱེས་ཀྱི་མིའི་བར་སྲིད་འཇུག་པའི་དབང་དུ་བྱས་ཀྱི། སྤྱིར་ན་བར་སྲིད་ཐོགས་མེད་ཡིན་པས་འཇུག་པའི་སྒོ་ལ་བུ་ག་མི་དགོས་ཏེ། ལྕགས་ཀྱི་ཐོ་ལུམ་གཤགས་པའི་ནང་ནས་སྲིན་བུ་འབྱུང་བར་གྲག་གོ །ཞེས་མཛོད་འགྲེལ་ལས་བཤད་པ་དང་། ཤིན་ཏུ་སྲ་བའི་བྲག་དང་རྡོ་རིལ་སེར་ཁ་མེད་པའི་ནང་དུའང་སེམས་ཅན་ཡོད་པའི་ཕྱིར་རོ། །མངལ་དུ་ལུས་རིམ་གྱིས་འཕེལ་ཚུལ་ནི། མངལ་དེ་ནི་མའི་ཕོ་བའི་འོག་ལོང་གའི་སྟེང་གི་བར་དེར་ཡོད་པར་མངལ་འཇུག་ལས་བཤད་དོ། །དེ་ལ་དང་པོ་མེར་མེར་པོ་ནི། ཕྱི་འོ་མ་སྐོལ་བའི་སྤྲིས་མ་ལྟ་བུས་གཡོགས་པ་ལ་ནང་ཤིན་ཏུ་སླ་བའོ། །དེ་ནས་བཟུང་སྟེ་ཕུང་པོ་རགས་པ་གྲུབ་པ་ཡིན་པས་འཆི་བ་ལ་ཐུག་གི་བར་གྱི་ལུས་ཕྲ་རགས་རྣམས་འབྱུང་བ་བཞིའི་ཁམས་ལས་གྲུབ་པ་ཡིན་པས། ས་རླུང་གིས་འཛིན་པར་བྱེད། ཆུ་རླུང་གིས་སྡུད་པར་བྱེད། མེ་རླུང་གིས་མ་རུལ་ཅིང་སྨིན་པར་བྱེད། རླུང་རླུང་གིས་རྒྱས་པར་བྱེད་དོ། །མེར་མེར་པོ་ཞག་བདུན་སོང་བ་ན་རླུང་གསར་པ་སྐྱེ་སྟེ་རླུང་གིས་སྨིན་པར་བྱས་པ་ལས་ལྟར་པོ་ནི་ཕྱི་ནང་གཉིས་ཀ་ཞོ་ལྟར་སྐ་ལ་ཤར་མ་གྱུར་པའོ། །དེ་ཞག་བདུན་སོང་བ་ན་དེ་ནས་ཡང་རླུང་གསར་པ་སྐྱེ་སྟེ་སྨིན་པར་བྱས་པ་ལས་གོར་གོར་པོ་ནི་ཤར་ནི་གྱུར་ལ་མནན་མི་བཟོད་པའོ། །དེ་ཞག་བདུན་སོང་བ་ན་རླུང་གསར་པས་སྨིན་པར་བྱས་པ་ལས་མཁྲང་དུ་གྱུར་པ་ནི་ཤ་སྐ་ཞིང་མནན་བཟོད་པའོ། །དེ་ཞག་བདུན་སོང་བ་ན་ཡང་རླུང་གསར་བས་སྨིན་པར་བྱས་པ་ལས་རྐང་ལག་འགྱུས་པ་ནི་བརླ་གཉིས་དང་དཔུང་བ་གཉིས་མགོ་བོའི་མཚན་མ་སྟེ་འབུར་པོ་ལྔ་གསལ་བར་དོད་པ་སྟེ་མངལ་གྱི་གནས་སྐབས་ལྔར་རྣམ་གཞག་རིམ་པར་གསུངས་ལ། མཛོད་འགྲེལ་དང་། ལུང་གི་མངལ་འཇུག་ལས། ནུར་ནུར་པོ་དང་། མེར་མེར་པོ་དང་། ཕྱི་མ་གསུམ་སྔར་བཞིན་དུ་བཤད་ཅིང་། སའི་དངོས་གཞི་ལས་དེ་གཉིས་ལྡོག་སྟེ་བཤད་ཀྱང་མིང་འདོགས་ཀྱི་རིམ་པ་མི་འདྲ་བ་ཙམ་མ་གཏོགས་དོན་ལ་འགལ་བ་མེད་པར་གསུང་། བདུན་ཕྲག་བཞི་པའི་ཁོངས་སུ་ཐིག་ལེ་དཀར་དམར་རྣམས་དྭངས་སྙིགས་ཕྱེ་ནས། དཀར་པོ་ལས་ནང་དུ་ཁུ་བ་རུས་པ་རྐང་རུས་པ་སྟེ་ཕ་ལས་ཐོབ་པའི་མཛོད་གསུམ་དང་། ཐིག་ལེ་དམར་པོ་ལས་ཕྱི་རུ་ཤ་པགས་པ་ཁྲག་སྟེ་མ་ལས་ཐོབ་པའི་མཛོད་གསུམ་འབྱུང་། རྣམ་ཤེས་ཐོག་མར་གང་དུ་ཞུགས་པའི་ཁུ་ཁྲག་གི་གནས་དེ་ཕྱིས་སྙིང་གར་འགྱུར་བའི་དེར་ཤིན་ཏུ་ཕྲ་བའི་རླུང་སེམས་གཉིས་དང་། ཁུ་ཁྲག་གི་དྭངས་མ་གཉིས་ཏེ་བཞི་འདུས་པའི་གོང་བུ་ཡུངས་ཀར་སྦོམ་པོའི་ཚད་ཙམ་པ་དེའི་དབུས་སུ་འཐུམས་ནས་རྩ་དབུ་མ་དང་། གཡས་གཡོན་དུ་རྩ་རོ་རྐྱང་གཉིས་ཀྱིས་དབུ་མ་ལ་ལན་གསུམ་གྱིས་དཀྲིས་པ་ཆགས། དེ་ནས་གྱེན་རྒྱུའི་རླུང་ཡར་སྐྱེ་ཐུར་སེལ་གྱི་རླུང་མར་སོང་བའི་སྟོབས་ཀྱིས་རོ་རྐྱང་དབུ་མ་གསུམ་ཡར་མར་དུ་གྱེས་ཏེ། མགོ་མཇུག་གཉིས་ཕྲ་ལ་དབུས་སྦོམ་པ་ཉའི་དབྱིབས་ལྟ་བུ་འབྱུང་། དེ་ནས་རིམ་གྱིས་འབུར་པོ་ལྔ་དང་། དེ་རྗེས་ཡན་ལག་ལྔ་དང་། དེའི་འོག་ཏུ་སྐྲ་དང་སེན་མོ་དང་བ་སྤུ་ལ་སོགས་པ་དང་དབང་པོ་གཟུགས་ཅན་པ་རྣམས་དང་། ཕོ་མོའི་མཚན་མ་དང་། ཁ་ནས་རྒྱུ་བའི་དབུགས་རླུང་དང་། བྱེད་པ་ལྕེ་རྐན་ལ་སོགས་པའི་ངག་གི་གནས་བརྒྱད། ཡིད་ཤེས་ཡུལ་ལ་གཡོ་བའི་དྲན་པ་རྫོགས་པ་རྣམས་རིམ་བཞིན་འབྱུང་བར་འགྱུར་རོ། །དེ་ལྟར་མངལ་ཆགས་ནས་བུ་ཡིན་ན་མའི་གློ་གཡས་སུ་ཁ་རྒྱབ་ངོས་སྒལ་གཞུང་ལ་ཕྱོགས་ཏེ་ཙོག་པུ་དང་། བུ་མོ་ཡིན་ན་མའི་གློ་གཡོན་དུ་ཁ་མདུན་ངོས་སུ་ཕྱོགས་ཏེ་ཙོག་པུར་གནས། མངལ་དུ་གནས་པའི་ཡུན་ཚད་ཀྱང་དགའ་བོ་མངལ་འཇུག་གི་མདོ་ལས་ཞག་བདུན་ཕྲག་སོ་བརྒྱད་རྫོགས་ནས་བཙའ་བར་གསུངས་པས། ཞག་ཉིས་བརྒྱ་རེ་དྲུག་དང་། སའི་དངོས་གཞིར་དེའི་སྟེང་དུ་ཞག་བཞི་པ་ནས་ཞག་གཉིས་བརྒྱ་བདུན་ཅུ་རྫོགས་ནས་བཙའ་བར་གསུངས། སྡོམ་འབྱུང་ལས་ཟླ་བ་བཅུ་པ་ལ་ཕྱིར་འབྱུང་བའི་སེམས་དང་ལྡན་པར་གསུང་། དེ་གསུམ་ག་ཟླ་བ་རོལ་པོ་དགུ་དང་ངོ་བཅུར་བྱེད་པ་མཐུན་ཏེ། མངལ་འཇུག་དང་སའི་དངོས་གཞི་ལས་གསུངས་པའི་ཞག་དང་ཟླ་བ་ནི་ཚེས་ཟླའི་དབང་དུ་བྱེད་དོ། །དེ་ཡང་བདུན་ཕྲག་སོ་ལྔ་པ་ལ་ཕུང་ཁམས་སྐྱེ་མཆེད་ཡན་ལག་དང་ཉིང་ལག །སྐྲ་སེན་སོགས་ལུས་དང་། ངག་སྨྲ་བའི་གནས་ལྕེ་རྐན་དང་། ཡིད་ཤེས་ཡུལ་ལ་འཇུག་པའི་དྲན་པ་རྣམས་རྫོགས་ཏེ་བདུན་ཕྲག་སོ་དྲུག་པ་ལ་མངལ་དུ་མི་དགའ་ཞིང་ཕྱིར་འབྱུང་འདོད་སྐྱེ། སོ་བདུན་པ་ལ་མངལ་དུ་དྲི་ང་བ་དང་མི་གཙང་བའི་འདུ་ཤེས་སྐྱེ། མཐར་ཉིན་ཞག་བདུན་ཕྲག་སོ་བརྒྱད་པ་ལ་སྔོན་གྱི་ལས་ལས་སྐྱེས་པའི་ཡན་ལག་གཅེས་བྱ་བའི་རླུང་ལངས་ནས། མངལ་གྱི་སེམས་ཅན་དེའི་ལུས་པའི་ཁ་ཐུར་དུ་ལྟ་བ་ཞེས་བྱ་བའི་རླུང་ལངས་ནས། མངལ་གྱི་སེམས་ཅན་མགོ་ཐུར་དང་རྐང་གྱེན་དུ་བསྟན་པ་དྲི་ཆུའི་ལམ་དུ་ཕུལ་བར་བྱེད་དེ་བདུན་ཕྲག་སོ་བརྒྱད་པའི་མཐར་ཕྱིར་ཐོན་ནས་ཐ་མལ་པའི་མིག་ལམ་དུ་གྱུར་ཏེ། བྱིས་པ། གཞོན་ནུ། དར་བབ། དར་ཡོལ། རྒས་པ་སྟེ་བཙས་པའི་གནས་སྐབས་ལྔ་པོ་རིམ་གྱིས་འབྱུང་བ་ཡིན་ནོ། །དེ་ཡང་རྩ་རླུང་ཐིག་ལེ་ཆགས་ཚུལ་ནི། ཐོག་མར་སྙིང་གའི་རོ་རྐྱང་དབུ་མ་གསུམ་ལ་དང་། ཤར་གྱི་སུམ་སྐོར་མ། ལྷོའི་འདོད་མ་སྟེ་རྩ་ལྔ་དུས་མཉམ་དུ་འཆགས། དེ་རྗེས་དབུ་མ་དང་ལྷན་ཅིག་ཏུ་གནས་པའི་བདུད་བྲལ་མ་དང་། ནུབ་ཀྱི་ཁྱིམ་མ། བྱང་གི་གཏུམ་མོ་གསུམ་དུས་མཉམ་དུ་འཆགས་པ་ལ་སྙིང་གར་ཐོག་མར་ཆགས་པའི་རྩ་བརྒྱད་ཅེས་བྱའོ། །དེ་ནས་ཕྱོགས་ཀྱི་རྩ་བཞི་ལས་གཉིས་གཉིས་སུ་གྱེས་ཏེ་མཚམས་ཀྱི་རྩ་འདབ་བཞི་དང་། སྙིང་གའི་རྩ་འདབ་བརྒྱད་ཀྱི་རྒྱུན་གསུམ་གསུམ་དུ་གྱེས་ནས་གནས་ཉེར་བཞིའི་རྩ་ཉེར་བཞི་འཆགས། ཉེར་བཞི་པོ་རེ་རེ་ལས་གསུམ་གསུམ་དུ་གྱེས་པས་བདུན་ཅུ་རྩ་གཉིས་དང་། དེ་རེ་རེ་ལས་སྟོང་སྟོང་དུ་གྱེས་ཏེ་ལུས་ལ་རྩ་བདུན་ཁྲི་ཉིས་སྟོང་འཆགས་པ་ཡིན་ནོ། །རླུང་ཆགས་ཚུལ་ནི། དང་པོར་མངལ་དུ་ཉིང་མཚམས་སྦྱར་ནས་ཟླ་བ་དང་པོ་ལ་སྲོག་འཛིན་གྱི་རླུང་ཕྲ་བ་ལས་སྲོག་འཛིན་རགས་པ་སྐྱེ། དེའི་ཚེ་སེམས་ཅན་དེའི་ལུས་ཀྱི་དབྱིབས་ཉའི་རྣམ་པ་ལྟ་བུར་ཡོད། ཟླ་བ་གཉིས་པ་ལ་སྲོག་འཛིན་གྱི་རླུང་དེ་ལས་ཐུར་སེལ་སྐྱེ། དེའི་ཚེ་སེམས་ཅན་དེའི་ལུས་འབུར་པོ་ལྔ་དོད་པ་རུས་སྦལ་ལྟ་བུར་ཡོད། ཟླ་བ་གསུམ་པ་ལ་ཐུར་སེལ་ལས་མཉམ་གནས་སྐྱེ། དེའི་ཚེ་སེམས་ཅན་དེའི་ལུས་སྟོད་ཅུང་ཟད་སྒུར་བ་ཕག་རྒོད་ཀྱི་རྣམ་པར་ཡོད། ཟླ་བ་བཞི་པ་ལ་མཉམ་གནས་ལས་གྱེན་རྒྱུ་སྐྱེ། དེའི་ཚེ་ལུས་སྟོད་ཅུང་ཟད་རྒྱས་པས་སེང་གེའི་རྣམ་པར་ཡོད། ཟླ་བ་ལྔ་པ་ལ་གྱེན་རྒྱུ་ལས་ཁྱབ་བྱེད་སྐྱེ། དེའི་ཚེ་སེམས་ཅན་དེའི་ལུས་མིའུ་ཐུང་གི་དབྱིབས་སུ་ཡོད་པར་བཤད། ཟླ་བ་དྲུག་པ་ལ་མིག་གི་སྒོར་རྒྱུ་བའི་རླུང་རྒྱུ་བ་ཞེས་བྱ་བ་དང་། འབྱུང་བ་ས་སྐྱེ། ཟླ་བ་བདུན་པ་ལ་རྣ་བའི་སྒོར་རྒྱུ་བའི་རླུང་རྣམ་པར་རྒྱུ་བ་དང་འབྱུང་བ་ཆུ་སྐྱེ། ཟླ་བ་བརྒྱད་པ་ལ་སྣའི་སྒོར་རྒྱུ་བའི་རླུང་ཡང་དག་པར་རྒྱུ་བ་དང་འབྱུང་བ་མེ་སྐྱེ། ཟླ་བ་དགུ་པ་ལ་ལྕེའི་སྒོར་རྒྱུ་བའི་རླུང་རབ་ཏུ་རྒྱུ་བ་དང་འབྱུང་བ་རླུང་སྐྱེ། ཟླ་བ་བཅུ་པ་ལ་ལུས་ཀྱི་སྒོར་རྒྱུ་བའི་རླུང་ངེས་པར་རྒྱུ་བ་ཞེས་བྱ་བ་དང་འབྱུང་བ་ནམ་མཁའི་ཁམས་སྐྱེ། དེའི་ཚེ་ལུས་ཀྱི་སྦུབས་སྟོང་རྣམས་འབྱུང་ངོ་། །མངལ་དུ་རླུང་བཅུ་ཆགས་ཀྱང་དེར་སྣ་སྒོ་ནས་འབྱུང་འཇུག་མི་བྱེད་ལ། ཕྱིར་བཙས་མ་ཐག་ཏུ་སྣ་སྒོ་ནས་འབྱུང་འཇུག་བྱེད་པར་གསུངས་སོ། །ཐིག་ལེ་ཆགས་ཚུལ་ནི། ཁམས་དཀར་དམར་གྱི་དྭངས་མ་དང་ཤིན་ཏུ་ཕྲ་བའི་རླུང་སེམས་འདུས་པའི་གོང་བུ་ཡུངས་དཀར་སྦོམ་པོའི་ཚད་ཙམ་པ་སྙིང་གའི་དྷཱུ་ཏཱིའི་དབུས་ཀྱི་སྦུབས་སྟོང་ཅུང་ཟད་ཡོད་པའི་ནང་དུ་གནས་པ་དེ་ལ་མི་ཤིགས་པའི་ཐིག་ལེ་ཞེས་བྱ་ལ། དེ་ནས་ཐིག་ལེ་དཀར་པོ་དེ་ལས་ཆ་ཤས་གཅིག་སྤྱི་བོའི་རྩ་འཁོར་གྱི་ནང་དུ་སོང་སྟེ་གནས་པ་ལ་ཧི་ཡིག་ཅེས་བྱ། དེས་ལུས་ཀྱི་གནས་གཞན་གྱི་ཐིག་ལེ་དཀར་པོ་རྣམས་དངོས་སམ་བརྒྱུད་པའི་སྒོ་ནས་འཕེལ་བར་བྱེད། སྙིང་གའི་ཐིག་ལེ་དམར་པོ་ལས་ཆ་གཅིག་ལྟེ་བའི་རྩ་འཁོར་གྱི་ནང་དུ་སོང་སྟེ་གནས་པ་ལ་གཏུམ་མོ་ཞེས་བྱ་སྟེ། དེས་ལུས་ཀྱི་གནས་གཞན་རྣམས་ཀྱི་ཁམས་དམར་པོ་རྣམས་དངོས་བརྒྱུད་ཅི་རིགས་པའི་སྒོ་ནས་འཕེལ་བར་བྱེད་དོ། །རྩ་འཁོར་རེ་རེ་ན་ཐིག་ལེ་ཆ་ཤས་རེ་གནས་ཀྱང་། སྤྱི་བོའི་རྩ་འཁོར་ནི་ཁམས་དཀར་པོ་འཕེལ་བའི་གནས་ཀྱི་གཙོ་བོ་དང་། ལྟེ་བའི་རྩ་འཁོར་ན་ཁམས་དམར་པོ་འཕེལ་བའི་གནས་ཀྱི་གཙོ་བོ་ཡིན་ལ། སྙིང་གའི་རྩ་འཁོར་ནི་ཁམས་དཀར་དམར་ཆ་མཉམ་དུ་འཕེལ་བའི་གནས་ཡིན་ནོ། །ཁམས་དཀར་དམར་དེ་ཡང་ནམ་དགོས་པའི་ཚེ་སྐྱེ་བ་ཡིན་གྱི་སྣོད་དུ་ཆུ་བླུག་པ་ལྟར་ཡོད་པ་མིན་གསུང་། སྐྱེ་གནས་སུ་ཉིང་མཚམས་སྦྱར་ནས་རགས་པའི་ལུས་སྐྱེ་བ་བླངས་པ་དེ་ལ་གཞིའི་སྤྲུལ་སྐུ་ཞེས་བྱའོ། །དེ་ལྟར་བར་དོ་མངལ་དུ་ཉིང་མཚམས་སྦྱར་ནས་སྐྱེ་བ་ལེན་པའི་རྣམ་བཞག་འདི་དག་ནི། བསྐྱེད་རིམ་པའི་སྐྱེ་བ་སྤྲུལ་སྐུར་འཁྱེར་བའི་ལམ་འཁྱེར་དང་། རྫོགས་རིམ་པའི་དག་མ་དག་གི་སྒྱུ་ལུས་རྣམས་རགས་པའི་སྤྲུལ་སྐུ་འཛིན་པའམ་ཕུང་པོ་རྙིང་པ་ལ་ཞུགས་ཏེ་ཐ་མལ་པའི་མིག་ལམ་དུ་གྱུར་པ་དང་རྣམ་པ་མཐུན་ཞིང་དེ་དག་གི་སྦྱང་གཞི་ཡིན་ཏེ། དེ་ཡང་བསྐྱེད་རྫོགས་གཉིས་ཀྱི་སྦྱང་གཞི་ལ་ཁྱད་པར་མེད་པས་བསྐྱེད་རིམ་ནི། གཞིའི་འཆི་བ་དང་། བར་དོ་དང་། སྐྱེ་བ་གསུམ་སྦྱང་གཞིར་བྱས་ནས་སྦྱོང་བྱེད་ལ་དེ་གསུམ་དང་རིམ་བཞིན་རྣམ་པ་མཐུན་པར་འཆི་བ་ཆོས་སྐུར་འཁྱེར་བའི་ལམ་འཁྱེར་དང་། བར་དོ་ལོངས་སྐུར་འཁྱེར་བའི་ལམ་འཁྱེར་དང་། སྐྱེ་བ་སྤྲུལ་སྐུར་འཁྱེར་བའི་ལམ་འཁྱེར་གསུམ་ཡན་ལག་དང་བཅས་པ་བསྒོམས་ཏེ། རྒྱུད་ནས་ཐ་མལ་གྱི་འཆི་བ། བར་དོ། སྐྱེ་བ་གསུམ་སྦྱངས་ནས། དེ་གསུམ་དང་རྣམ་པ་ཇི་ལྟ་བ་བཞིན་མཐུན་པའི་སྐུ་གསུམ་མངོན་དུ་བྱེད་པ་ཡིན་ལ། རྫོགས་རིམ་ནི་གཞིའི་ཆོས་གསུམ་པོ་དེ་དང་རྣམ་པ་ཇི་ལྟ་བ་བཞིན་མཐུན་པའི་ལམ་གྱིས་དེ་གསུམ་དངོས་སུ་སྦྱོང་བྱེད་ཡིན་ཏེ། དེ་ཡང་འཆི་བ་འོད་གསལ་དང་རྣམ་པ་ཇི་ལྟ་བ་བཞིན་མཐུན་པ་ནི། ལུས་དབེན། ངག་དབེན། སེམས་དབེན། སྒྱུ་ལུས། སློབ་པའི་ཟུང་འཇུག་རྣམས་ཀྱི་སྣང་མཆེད་ཐོབ་གསུམ་འོད་གསལ་དང་བཅས་པ་ཡིན་ལ། བར་དོ་དང་རྣམ་པ་ཇི་ལྟ་བ་བཞིན་མཐུན་པ་ནི། རིམ་པ་གསུམ་པའི་མ་དག་པའི་སྒྱུ་ལུས་དང་། སློབ་པའི་ཟུང་འཇུག་གི་དག་པའི་སྒྱུ་ལུས་ཡིན་ཞིང་། སྐྱེ་བ་དང་རྣམ་པ་ཇི་ལྟ་བ་བཞིན་མཐུན་པ་ནི། དག་མ་དག་གི་སྒྱུ་ལུས་རྣམས་ཕུང་པོ་རྙིང་པ་ལ་ཞུགས་ཏེ་ཐ་མལ་པའི་མིག་ལམ་དུ་གྱུར་པ་དེ་ཡིན་ནོ། །རྫོགས་རིམ་གྱི་ལམ་དེ་རྣམས་ཀྱིས་སྐྱེ་ཤི་བར་དོ་གསུམ་སྦྱོང་ཚུལ་དངོས་ནི། རྫོགས་རིམ་གྱི་རྣལ་འབྱོར་བས་རང་རྒྱུད་ཀྱི་ཤིན་ཏུ་ཕྲ་བའི་རླུང་སེམས་ངོ་བོ་དབྱེར་མེད་ཀྱི་ཡ་གྱལ་ཤིན་ཏུ་ཕྲ་བའི་སེམས་དེ་རིགས་འདྲ་གཅིག་ནས་གཅིག་ཏུ་བརྒྱུད་དེ་འཆི་བ་རང་དགའི་འོད་གསལ་དུ་འགྱུར་བ་དེ་ཏིང་ངེ་འཛིན་གྱི་མཐུས་བཀག་ནས། དེ་དང་རྣམ་པ་ཇི་ལྟ་བ་བཞིན་མཐུན་པའི་ལམ་དུས་སུ་དཔེ་དང་དོན་གྱི་འོད་གསལ་དང་། འབྲས་བུའི་འོད་གསལ་ཆོས་ཀྱི་སྐུར་བསྒྱུར་བ་ནི་འཆི་བ་སྦྱོང་ཚུལ་དང་། རྫོགས་རིམ་གྱི་རྣལ་འབྱོར་བས་དེ་འདྲའི་ཤིན་ཏུ་ཕྲ་བའི་རླུང་དེ་རིགས་འདྲ་གཅིག་ནས་གཅིག་ཏུ་བརྒྱུད་དེ་འཆི་བ་འོད་གསལ་རང་དགའ་བའི་བཞོན་པ་བྱས་ནས་བར་དོའི་ལུས་སུ་ལྡང་བ་དེ་ཏིང་ངེ་འཛིན་གྱི་མཐུས་བཀག་ནས། བར་དོ་དང་རྣམ་པ་ཇི་ལྟ་བ་བཞིན་མཐུན་པའི་མ་དག་པའི་སྒྱུ་ལུས་དང་། སློབ་མི་སློབ་ཀྱི་ཟུང་འཇུག་གི་དག་པའི་སྒྱུ་མའི་སྐུར་བསྒྱུར་བ་ནི་བར་དོ་སྦྱོང་ཚུལ་ཡིན་ལ། དེ་ལྟ་བུའི་སྒྱུ་ལུས་གྲུབ་ན་བར་དོ་གཏན་ནས་ཁེགས་ཤིང་དེའི་མཐུས་ལས་ཉོན་གྱིས་མངལ་དུ་སྐྱེ་བ་འཛིན་པའི་སྐྱེ་བའང་ཁེགས་ནས་བར་དོ་མའི་མངལ་དུ་སྐྱེ་བ་ལེན་པ་དང་རྣམ་པ་མཐུན་པར་སྒྱུ་ལུས་ཕུང་པོ་རྙིང་པ་ལ་ཞུགས་ཏེ་ཆོས་འཆད་པ་དང་ལམ་གོང་མ་སྒྲུབ་པའི་རྩོལ་བ་བྱེད་པ་ནི་སྐྱེ་བ་སྦྱོང་ཚུལ་ཡིན་ནོ། །དེས་ན་སྐྱེ་ཤི་བར་དོ་གསུམ་དངོས་སུ་འགོག་པར་བྱེད་པའི་རྩ་བ་ནི་སྒྱུ་ལུས་ཀྱི་དངོས་རྒྱུར་གྱུར་པའི་སེམས་དབེན་མཐར་ཐུག་གི་དཔེའི་འོད་གསལ་ཉིད་ཡིན་ཏེ། དེས་འཆི་བ་དངོས་སུ་ཁེགས་པའི་སྟོབས་ཀྱིས་བར་དོ་དང་སྐྱེ་བ་རང་ཤུགས་ཀྱིས་ཁེགས་པའི་ཕྱིར་རོ། །དེ་འདྲའི་དཔེའི་འོད་གསལ་ལས་སྒྱུ་ལུས་གྲུབ་པའི་ཚེ་བར་དོ་གཏན་ནས་ཁེགས་པ་ཡིན་ཏེ། བར་དོའི་ལུས་སུ་ལྡང་བའི་ཤིན་ཏུ་ཕྲ་བའི་རླུང་དེ་སྒྱུ་མའི་སྐུར་གྱུར་ཟིན་པའི་ཕྱིར། བར་དོ་གཏན་ནས་ཁེགས་ན་ལས་ཉོན་གྱིས་སྐྱེ་བ་མི་ལེན་པའི་རྒྱུ་མཚན་གྱིས། སྒྱུ་ལུས་ཐོབ་ན་ཚེ་དེ་ལ་འཚང་རྒྱ་བས་ཁྱབ་པོ། །གོང་དུ་བཤད་པ་དེ་རྣམས་ཀྱི་ཤེས་བྱེད་ཀྱི་ལུང་འདྲེན་རྣམས་མངས་ཀྱི་དོགས་ནས་མ་བྲིས་པས། རྗེ་ཡབ་སྲས་ཀྱི་ལེགས་བཤད་དང་རྗེས་འབྲང་མཁས་གྲུབ་དམ་པ་རྣམས་ཀྱི་གསུང་ལས་ཤེས་པར་བྱའོ༎ ༎

སྨྲས་པ། ཚུལ་འདི་རྒྱལ་བ་གཉིས་པ་ཡབ་སྲས་དང་། །རྗེས་འབྲང་མཁས་པའི་གསུང་བཞིན་བྲིས་མོས་ཀྱང་། །དམ་པའི་དགོངས་པ་མ་ལོན་ནོངས་པའི་ཚོགས། །ཅི་མཆིས་བླ་མ་ལྷ་དང་མཁས་ལ་བཤགས། །འདིས་མཚོན་དགེ་བས་བདག་གཞན་འགྲོ་བ་ཀུན། །ཟབ་ལམ་རིམ་པ་གཉིས་ཀྱི་རྣལ་འབྱོར་གྱིས། །མ་དག་སྐྱེ་ཤི་བར་དོ་སྐུ་གསུམ་དུ། །སྒྱུར་མཛད་ལམ་བཟང་མྱུར་དུ་མཐར་ཕྱིན་ཤོག །

ཅེས་པ་འདི་ནི་གྱི་ན་པ་དབྱངས་ཅན་དགའ་བའི་བློ་གྲོས་ཀྱིས་དམ་པའི་གསུང་ལས་བཏུས་ཏེ་རང་གི་བརྗེད་བྱང་དུ་བྲིས་པའོ།།

ཞེས་པ་འདི་ཡང་དེ་སྔ་སཱུ་ངོ་ཏཱ་བླ་མ་ཐུབ་བསྟན་ནོར་བཟང་མཆོག་ནས་དཔར་བསྐྲུན་མཛད་པར་མ་ཕྱི་ཞུས་ཏེ། སླར་བོད་རབ་ལོ་ ༩༤༤ ལྕགས་ཁྱི་བོད་ཟླ་གསུམ་པའི་ཚེས་ལ་དག་སློང་བློ་བཟང་བསྟན་འཛིན་ནས་རྒྱུ་སྦྱར་ཏེ་དི་ལིར་དཔར་བསྐྲུན་ཞུས་པ་འོ༎ ༎

ཀརྨ་ཚེ་རིང།