1 བྱིས་བའི་འབུམ་ཆུང་བཞུགས་སོ༎

༈ བྱིས་བའི་འབུམ་ཆུང་བཞུགས་སོ༎
༈ རྒྱ་གར་སྐད་དུ། ཤཏ་སཧ་སྲི་ཀ་པྲཛྙཱ་པ་ར་མི་ཏ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་སྟོང་ཕྲག་བརྒྱ་པའི་དོན་མ་ནོར་བར་བསྡུས་པ། ཐམས་ཅད་བསྐྱེད་པའི་ཡུམ་ལ་ཕྱག་འཚལ་ལོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཏིང་ངེས་འཛིན་ལས་བཞེངས་ནས། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ། དགེ་སློང་ལྔ་སྟོང་ཙམ་གྱི་དགེ་འདུན་ཆེན་པོ་དང་། ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དཔང་དུ་གྱུར་པ། སེམས་ཤིན་ཏུ་རྣམ་པར་གྲོལ་པ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། བཀའ་ཡང་དག་པའི་སེམས་ཤིན་ཏུ་རྣམ་པར་གྲོལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། འཕགས་པ་སྤྱན་རས་གཟིགས་དབང་ཕྱུག་དང་། རབ་འབྱོར་དང་། ཀུན་དགའ་བོ་ལ་སོགས་པའི་ལྷ་དང་། མི་ལ་སོགས་པའི་སེམས་ཅན་མཐའ་ཡས་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་འོད་ཟེར་བྱེ་བ་དྲུག་ཅུ་གཟིགས་ཤིང་འཕྲོས་པར་གྱུར་ཏོ། དེ་ནས་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་མངོན་པར་རབ་ཏུ་བརྒྱན་པར་གྱུར་ཏོ། ཚེ་དང་ལྡན་པ་རྣམས་ཀྱིས་ཕྱག་ཕུལ་ཞིང་། མཆོད་པའི་རྣམ་གྲངས་བསྟན་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྣམས་ལ་བཀའ་སྩལ་པ། འཕགས་པ་སྤྱན་རས་གཟིགས་དབང་ཕྱུག་དང་། རབ་འབྱོར་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་འབྱུང་བར་འགྱུར་བ། དེ་བཞིན་དུ་ཁྱོད་སློབ་པར་གྱིས་ཤིག །ཡུལ་དྲུག་དང་། ཕུང་པོ་ལྔའོ། གཟུགས་དང་། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་དང་། སྐྱེ་མཆེད་བཅུ་གཉིས་དང་། དབང་པོ་དྲུག་གོ །མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་སོ། རྣམ་པར་ཤེས་པའི་དོན་ནི། མིག་གི་རྣམ་པར་ཤེས་པ་དང་། རྣ་བའི་རྣམ་པར་ཤེས་པ་དང་། སྣའི་རྣམ་པར་ཤེས་པ་དང་། ལྕེའི་རྣམ་པར་ཤེས་པ་དང་། ལུས་ཀྱི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པ་དང་། རེག་པའི་དོན་ནི། མིག་གི་འདུས་ཏེ་རེག་པ་དང་། རྣ་བའི་འདུས་ཏེ་རེག་པ་དང་། སྣའི་འདུས་ཏེ་རེག་པ་དང་། ལྕེའི་འདུས་ཏེ་རེག་པ་དང་། ལུས་ཀྱི་འདུས་ཏེ་རེག་པ་དང་། ཡིད་ཀྱི་འདུས་ཏེ་རེག་པ་དང་། རེག་པའི་རྐྱེན་གྱིས་ཚོར་བའི་དོན་ནི། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་དང་། རྣ་བའི་འདུས་ཏེ་རེག་པའི་རྐྱེན་གྱིས་ཚོར་བ་དང་། སྣའི་འདུས་ཏེ་རེག་པའི་རྐྱེན་གྱིས་ཚོར་བ་དང་། ལྕེའི་འདུས་ཏེ་རེག་པའི་རྐྱེན་གྱིས་ཚོར་བ་དང་། ལུས་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་དང་། ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་དང་། ཁམས་དྲུག་གི་དོན་ནི། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་དང་། རྟེན་ཅིང་འབྲེལ་བར་བཅུ་གཉིས་ཀྱི་དོན་ནི། མ་རིག་པ་དང་། འདུ་བྱེད་དང་། རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་དང་། བྱེད་པ་པོའི་སྐྱེ་མཆེད་བཅུ་གཉིས་ཀྱི་དོན་ནི། བདག་དང་། སེམས་ཅན་དང་། སྲོག་དང་། འགྲོ་བ་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ཅན་དང་། ཤེད་བདག་དང་། བྱེད་པ་པོ་དང་། ཚོར་བ་པོ་དང་། ཤེས་པ་པོ་དང་། མཐོང་བ་པོ་དང་། འདོད་ཁམས་ཀྱི་ལྷ་རྣམས་ཡོད་དོ། རྒྱལ་ཆེན་བཞིའི་རིགས་ཀྱི་ལྷ་རྣམས་ཡོད་དོ། སུམ་ཅུ་རྩ་གསུམ་ཀྱི་ལྷ་རྣམས་ཡོད་དོ། མཚེ་མའི་ལྷ་རྣམས་ཡོད་དོ། དགའ་ལྡན་གྱི་ལྷ་རྣམས་ཡོད་དོ། འཕྲུལ་དགའི་ལྷ་རྣམས་ཡོད་དོ། གཞན་འཕྲུལ་དབང་བྱེད་ཀྱི་ལྷ་རྣམས་ཡོད་དོ། གཟུགས་ཁམས་གནས་རིགས་བཅུ་འདུན་གྱིས་ལྷ་རྣམས་ཡོད་དོ། ཚངས་རིས་ཀྱི་ལྷ་རྣམས་ཡོད་དོ། ཚངས་ལྷ་ཉེ་ཕན་གྱི་ལྷ་རྣམས་ཡོད་དོ། ཚངས་པ་ཀུན་འཁོར་གྱི་ལྷ་རྣམས་ཡོད་དོ། སྣང་བའི་ལྷ་རྣམས་ཡོད་དོ། འོད་སྣང་གི་ལྷ་རྣམས་ཡོད་དོ། ཚད་མེད་སྣང་བའི་ལྷ་རྣམས་ཡོད་དོ། ཀུན་ཏུ་སྣང་བའི་ལྷ་རྣམས་ཡོད་དོ། དགེ་བའི་ལྷ་རྣམས་ཡོད་དོ། ཆུང་དགེའི་ལྷ་རྣམས་ཡོད་དོ། ཚད་མེད་དགེ་བའི་ལྷ་རྣམས་ཡོད་དོ། ཚད་མེད་ཆེ་བའི་ལྷ་རྣམས་ཡོད་དོ། འབྲས་བུ་ཆེ་བའི་ལྷ་རྣམས་ཡོད་དོ། མི་ཆེ་བའི་ལྷ་རྣམས་ཡོད་དོ། མི་གདུང་བའི་ལྷ་རྣམས་ཡོད་དོ། གྱ་ནོམ་སྣང་བའི་ལྷ་རྣམས་ཡོད་དོ། ཤིན་ཏུ་མཐོང་བའི་ལྷ་རྣམས་ཡོད་དོ། འོག་མིན་གྱི་ལྷ་རྣམས་ཡོད་དོ། གཟུགས་མེད་སྐྱེ་མཆེད་མུ་བཞིའི་ལྷ་རྣམས་ཡོད་དོ། ནམ་མཁའ་མཐའ་ཡས་སྐྱེ་མཆེད་ཀྱི་ལྷ་རྣམས་ཡོད་དོ། རྣམ་ཤེས་མཐའ་ཡས་སྐྱེ་མཆེད་ཀྱི་ལྷ་རྣམས་ཡོད་དོ། ཅུང་ཟད་མེད་པའི་སྐྱེ་མཆེད་ཀྱི་ལྷ་རྣམས་ཡོད་དོ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ལྷ་རྣམས་ཡོད་དོ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་པ་ཉིད་དང་། དོར་བ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་། དྲན་པ་ཉེ་བར་བཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་དང་། འཕགས་པའི་བདེན་པ་བཞི་དང་། བསམ་གཏན་བཞི་དང་། ཚད་མེད་པ་བཞི་དང་གཟུགས་མེད་པའི་སྙོམས་པར་འཇུག་པ་བཞི་དང་། རྣམ་པར་ཐར་པ་བརྒྱད་དང་། མཐར་གྱིས་གནས་པའི་སྙོམས་པར་འཇུགས་པ་དགུ་དང་། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་ཤེས་པ་ལྔ་དང་། ཏིང་ངེས་འཛིན་རྣམས་དང་། གཟུངས་ཀྱི་སྒོ་རྣམས་དང་། དེ་མཞིན་གཤེགས་པའི་སྟོབས་བཅུ་དང་། རྣམ་པར་ཐར་པའི་དོན་བསྟན་པ་ནི། ཚེ་དང་ལྡན་པ་ཤཱ་ར་དྭ་ཏིའི་བུ་གཟུགས་རྣམ་པར་དག་པ་དང་། ཚོར་བ་རྣམ་པར་དག་པ་དང་། འདུ་ཤེས་རྣམ་པར་དག་པ་དང་། འདུ་བྱེད་རྣམ་པར་དག་པ་དང་། རྣམ་པར་ཤེས་པ་རྣམ་པར་དག་པ་དང་། མིག་རྣམ་པར་དག་པ་དང་། རྣ་བ་རྣམ་པར་དག་པ་དང་། སྣ་རྣམ་པར་དག་པ་དང་། ལྕེ་རྣམ་པར་དག་པ་དང་། ལུས་རྣམ་པར་དག་པ་དང་། ཡིད་རྣམ་པར་དག་པ་དང་། རབ་འབྱོར་གཞན་ཡང་གཟུགས་ཡོངས་སུ་དག་པ། གཟུགས་ཡོངས་སུ་དག་པས། སྒྲ་ཡོངས་སུ་དག་པ། སྒྲ་ཡོངས་སུ་དག་པས། དྲི་ཡོངས་སུ་དག་པ། དྲི་ཡོངས་སུ་དག་པས། རོ་ཡོངས་སུ་དག་པ། རོ་ཡོངས་སུ་དག་པས། རེག་ཡོངས་སུ་དག་པ། རེག་ཡོངས་སུ་དག་པས། ཆོས་ཡོངས་སུ་དག་པ། ཆོས་ཡོངས་སུ་དག་པས། མིག་གི་རྣམ་པར་ཤེས་པ་ཡོངས་སུ་རྣམ་པར་དག་པ་ནས། ཡིད་ཀྱི་རྣམ་པར་ཤེས་པ་ཡོེངས་སུ་རྣམ་པར་དག་པའོ། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་ཡོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་དང་། ལམ་གྱི་རྣམ་པར་ཤེས་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། འདས་པའི་དུས་ན་མ་ཐོགས་མ་ཆགས་པའི་ཡེ་ཤེས་གཟིགས་པར་འཇུག་གོ །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་དེ་དག་དང་། རབ་འབྱོར་དང་། ཀུན་དགའ་བོ་དང་། ཚེ་དང་ལྡན་པ་རྣམས་དང་། དེ་དག་གི་དགེ་སློང་གི་དགེ་འདུན་དང་། ལྷ་དང་། མི་དང་། ལྷ་མ་ཡིན་དང་། དྲི་ཟ་དང་། གྲུལ་བུམ་དང་། ལྟོ་འཕྱེ་ཆེན་པོར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ༎ ༎

2 ཙཀྲ་བཅུ་གསུམ་པའི་གཟུངས་གཞུགས་སོ༎


༈ ཙཀྲ་(read Sanskritized Tibetan as Chakra)བཅུ་གསུམ་པའི་གཟུངས་གཞུགས་སོ༎
༈ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། ( तद्यथा ॐ मुने मुने महामुनाये स्वाहा ।) ཏདྱ་ཐཱ། ཨོྃ་མནེ་མུནེ་མཧཱ་མུནཡེ་སྭཱཧཱ། བདག་འཁོར་དང་བཅས་པ་ལ་བསྲུང་བ་དང་། བསྐྱབ་པ་དང་། སྦ་བ་དང་། བྱིན་གྱིས་བརླབ་པ་དམ་པ་མཛད་དུ་གསོལ། སྲི་ངན་པ་ཐམས་ཅད་ལས་ཐར་བར་མཛད་དུ་གསོལ། དུ་རུ་དུ་རུ་ཙཀྲ། བཛྲ་ཡ་བཛྲ་ཡ་ཙཀྲ། ཧ་ན་ཧ་ན་ཙཀྲ། མ་ར་ཡ་མ་ར་ཡ་ཙཀྲ། གྷིན་དུ་མ་ལེ་ཨེ་ནན་ཙཀྲ། ཛཱ་ལ་ཛཱ་ལ་ཙཀྲ། ཧཱུཾ་ཧཱུཾ་ཕཊ་ཕཏ་ཙཀྲ། སརྦ་ཤ་གི་ནི་ཨ་བ་ར་ན་ཙཀྲ། བྷ་ལ་ཡ་བྷ་ལ་ཡ་ཙཀྲ། ན་ག་ཤ་ཡ་ན་ག་ཤ་ཡ་ཙཀྲ། ཧཱུཾ་ཕཊ་ཕཏ་ཙཀྲ། བྷ་མ་བྷ་མ་ཙཀྲ། ས་མནྟ་ཀ་ར་ཙ་ཏྲི་ཏིག་ན་ཙཀྲ། བདག་འཁོར་དང་བཅས་པ་དང་། ཆོས་མཛད་པ་དང་། དཀར་པོའི་ཕྱོགས་མཐའ་ཡས་པ་ལ་གནོད་པའི་དགྲ་བགེགས་འབྱུང་པོ་མི་མ་ཡིན་པའི་ཕྱོགས་ཐམས་ཅད་ཟློག་ཅིག །ཐུལ་ཅིག །རྐྱེན་དང་བར་དུ་གཅོད་པ་ཐམས་ཅད་ཟློག་ཅིག །བྱེར་ཅིག །སྲུངས་ཤིག །ནད་སྲི་དང་། འཆི་སྲི་དང་། གོད་སྲི་དང་། རྟ་སྲི་དང་། ཡེར་བའི་སྲི་དང་། ལོའི་སྲི་དང་། ཟླ་བའི་སྲི་དང་། ཞག་དུས་ཀྱི་སྲི་དང་། ཁ་སྨྲས་ཀྱི་སྲི་དང་། སྲི་ངན་པ་ཐམས་ཅད་ཟློག་ཅིག །གཞན་ཡང་སྲི་ངན་པ་ཐམས་ཅད་ལས་རྣམ་པ་ཀུན་ཏུ་སྲུངས་ཤིག །ཟློག་ཅིག །ཞི་བར་གྱུར་ཅིག །བདག་ཅག་འཁོར་དང་བཅས་པ་ལ་ནད་རིམས་དང་། གདོན་དང་། སྔགས་ཟོར་དང་། རྦད་འདྲེ་དང་། གློ་བུར་གྱི་ནད་དང་། རྒྱལ་པོའི་ཆད་པ་དང་། ཕྱོགས་ངན་པ་དང་། གནོད་པ་དང་། ནད་སྲི་དང་། འཆི་སྲི་དང་། དུས་སྲི་དང་། རྒན་སྲི་དང་། གཞོན་སྲི་དང་། དར་མའི་སྲི་དང་། ལོའི་སྲི་དང་། ཟླ་བའི་སྲི་དང་། ཞག་སྲི་དང་། ཟ་མའི་སྲི་དང་། སྐག་བདུན་ཟུར་དང་། ཕྱི་སྐྱེལ་དང་། གདོན་གསུམ་བརྒྱ་དྲུག་ཅུ་དང་། རྐྱེན་བཞི་ཁྲི་ཆིག་སྟོང་དང་། ལྟས་ངན་མི་མཐུན་པ་བརྒྱད་ཅུ་ཙ་གཅིག་གི་གནོད་པ་ཐམས་ཅད་དང་། མ་རུངས་པ་གདུགས་པ་ཅན་ཐམས་ཅད་འཇོམས་པར་གྱུར་ཅིག །ཟློག་པར་གྱུར་ཅིག །སྒྱུར་བར་གྱུར་ཅིག །སྲུང་བར་གྱུར་ཅིག །ཐུབ་པར་གྱུར་ཅིག །དེ་ལྟར་བརྗོད་པའི་ཡོན་ཏན་བསམ་གྱིས་མི་ཁྱབ་ཅིང་། སྲིའི་གནོད་པ་ཐམས་ཅད་ལས་གྲོལ་བར་འགྱུར་རོ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་བ་དང་། ཚེ་དང་ལྡན་པ་ཀུན་དགའ་བོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ཙཀྲ་བཅུ་གསུམ་པའི་གཟུངས་རྫོགས་སོ༎