རྟེན་འབྲེལ་བསྟོད་པ་བཞུགས་སོ།



༄༅ གང་ཞིག་གཟིགས་ཤིང་གསུངས་པ་ཡིས༎ མཁྱེན་དང་སྟོན་པ་བླ་ན་མེད༎
རྒྱལ་བ་རྟེན་ཅིང་འབྲེལ་བར་འབྱུང༌༎ གཟིགས་ཤིང་འདོམས་པ་དེ་ལ་འདུད༎

འཇིག་རྟེན་རྒུད་པ་ཇི་སྙེད་པ༎ དེ་ཡི་རྩ་བ་མ་རིག་སྟེ༎
གང་ཞིག་མཐོང་བས་དེ་ལྡོག་པ༎ རྟེན་ཅིང་འབྲེལ་བར་འབྱུང་བར་གསུངས༎

དེ་ཚེ་བློ་དང་ལྡན་པ་ཡིས༎ རྟེན་ཅིང་འབྲེལ་བར་འབྱུང་བའི་ལམ༎
ཁྱོད་ཀྱི་བསྟན་པའི་གནད་ཉིད་དུ༎ ཇི་ལྟར་ཁོང་དུ་ཆུད་མི་འགྱུར༎

དེ་ལྟ་ལགས་ན་མགོན་ཁྱོད་ལ༎ བསྟོད་པའི་སྒོར་ནི་སུ་ཞིག་གིས༎
བརྟེན་ནས་འབྱུང་བ་གསུང་པ་ལ༎ ངོ་མཚར་གྱུར་པ་ཅི་ཞིག་རྙེད༎

གང་གང་རྐྱེན་ལ་རགས་ལས་པ༎ དེ་དེ་རང་བཞིན་གྱིས་སྟོང་ཞེས༎
གསུང་པ་འདི་ལས་ཡ་མཚན་པའི༎ ལེགས་འདོམས་ཚུལ་ནི་ཅི་ཞིག་ཡོད༎

གང་དུ་བཟུང་བས་བྱིས་པ་རྣམས༎ མཐར་འཛིན་འཆིང་བ་བརྟན་བྱེད་པ༎
དེ་ཉིད་མཁས་ལ་སྤྲོས་པ་ཡིས༎ དྲ་བ་མ་ལུས་གཅོད་པའི་སྒོ༎

བསྟན་འདི་གཞན་དུ་མ་མཐོང་བས༎ སྟོན་པ་ཞེས་བྱ་ཁྱོད་ཉིད་དེ༎
ཝ་སྐྱེས་ལ་ནི་སེངྒེ་བཞིན༎ མུ་སྟེགས་ཅན་ལའང་གཅམ་བུའི་ཚིག༎

ཨེ་མའོ་སྟོན་པ་ཨེ་མའོ་སྐྱབས༎ ཨེ་མའོ་སྨྲ་མཆོག་ཨེ་མའོ་མགོན༎
རྟེན་ཅིང་འབྲེལ་འབྱུང་ལེགས་གསུང་པའི༎ སྟོན་པ་དེ་ལ་བདག་ཕྱག་འཚལ༎

ཕན་མཛད་ཁྱོད་ཀྱིས་འགྲོ་བ་ལ༎ སྨན་པའི་སླད་དུ་བཀའ་སྩལ་པ༎
བསྟན་པའི་སྙིང་པོ་སྟོང་པ་ཉིད༎ ངེས་པའི་རྒྱུ་མཚན་ཟླ་མེད་པ༎

རྟེན་ཅིང་འབྲེལ་བར་འབྱུང་བའི་ཚུལ༎ འགལ་བ་དང་ནི་མ་གྲུབ་པར༎
མཐོང་བ་འདི་ཡིས་ཁྱོད་ཀྱི་ལུགས༎ ཇི་ལྟར་ཁོང་དུ་ཆུད་པར་ནུས༎

ཁྱོད་ནི་ནམ་ཞིག་སྟོང་པ་ཉིད༎ རྟེན་འབྱུང་དོན་དུ་མཐོང་བ་ན༎
རང་བཞིན་གྱིས་ནི་སྟོང་པ་དང༌༎ བྱ་བྱེད་འཐད་པའང་མི་འགལ་ཞིང༌༎

དེ་ལས་བཟློག་པར་མཐོང་བ་ན༎ སྟོང་ལ་བྱ་བ་མི་རུང་ཞིང༌༎
བྱ་དང་བཅས་ལ་སྟོང་མེད་པས༎ ཉམ་ངའི་གཡང་དུ་ལྷུང་བར་བཞེད༎

དེ་ཕྱིར་ཁྱོད་ཀྱི་བསྟན་པ་ལ༎ རྟེན་འབྱུང་མཐོང་བ་ལེགས་པར་བསྔགས༎
དེ་ཡང་ཀུན་ཏུ་མེད་པ་དང༌༎ རང་བཞིན་གྱིས་ནི་ཡོད་པས་མིན༎

བལྟོས་མེད་ནམ་མཁའི་མེ་ཏོག་བཞིན༎ དེས་ན་མ་བརྟེན་ཡོད་མ་ཡིན༎
ངོ་བོས་གྲུབ་ན་དེ་འགྲུབ་པ༎ རྒྱུ་དང་རྐྱེན་ལ་ལྟོས་པར་འགལ༎

དེ་ཕྱིར་བརྟེན་ནས་འབྱུང་བ་ལས༎ མ་གཏོགས་ཆོས་འགའ་ཡོད་མིན་པས༎
རང་བཞིན་གྱིས་ནི་སྟོང་པ་ལས༎ མ་གཏོགས་ཆོས་འགའ་མེད་པར་གསུངས༎

རང་བཞིན་ལྡོག་པ་མེད་པའི་ཕྱིར༎ ཆོས་རྣམས་རང་བཞིན་འགའ་ཡོད་ན༎
མྱ་ངན་འདས་པ་མི་རུང་ཞིང༌༎ སྤྲོས་ཀུན་ལྡོག་པ་མེད་པར་གསུངས༎

དེ་ཕྱིར་རང་བཞིན་རྣམ་བྲལ་ཞེས༎ སེངྒེའི་སྒྲ་ཡིས་ཡང་ཡང་དུ༎
མཁས་པའི་ཚོགས་སུ་ལེགས་གསུངས་པ༎ འདི་ལ་སུ་ཡིས་འགོང་བར་ནུས༎

རང་བཞིན་འགའ་ཡང་མེད་པ་དང༌༎ འདི་ལ་བརྟེན་ནས་འདི་འབྱུང་བའི༎
རྣམ་གཞག་ཐམས་ཅད་འཐད་པ་གཉིས༎ མི་འགལ་འདུ་བ་སྨོས་ཅི་དགོས༎

བརྟེན་ནས་འབྱུང་བའི་རྒྱུ་མཚན་གྱིས༎ མཐར་ལྟ་བ་ལ་མི་བརྟེན་ཞེས༎
ལེགས་གསུངས་འདི་ནི་མགོན་ཁྱོད་ཀྱི༎ སྨ་བ་བླ་ན་མེད་པའི་རྒྱུ༎

འདི་ཀུན་ངོ་བོས་སྟོང་པ་དང༌༎ འདི་ལས་འདི་འབྲས་འབྱུང་བ་ཡི༎
ངེས་པ་གཉིས་པོ་ཕན་ཚུན་དུ༎ གེགས་མེད་པར་ནི་གྲོགས་བྱེད་པ༎

འདི་ལས་ངོ་མཚར་གྱུར་པ་དང༎ འདི་ལས་རྨད་དུ་བྱུང་བ་གང༌༎
ཚུལ་འདིས་ཁྱོད་ལ་བསྟོད་ན་ནི༎ བསྟོད་པར་འགྱུར་གྱི་གཞན་དུ་མིན༎

རྨོངས་པས་བྲན་དུ་བཟུང་བ་ཡིས༎ གང་ཞིག་ཁྱོད་དང་ཞེ་འགྲས་པ༎
དེ་ཡིས་རང་བཞིན་མེད་པའི་སྒྲ༎ མི་བཟོད་གྱུར་ལ་མཚར་ཅི་ཡོད༎

ཁྱོད་ཀྱི་གསུང་གི་གཅེས་པའི་མཛོད༎ བརྟེན་ནས་འབྱུང་བར་ཁས་བླངས་ནས༎
སྟོང་ཉིད་ང་རོ་མི་བཟོད་པ༎ འདི་ལ་ཁོ་བོ་ངོ་མཚར་གྱུར༎

རང་བཞིན་མེད་ལ་བཀྲི་བའི་སྒོ༎ བླ་མེད་རྟེན་ཅིང་འབྲེལ་འབྱུང་གི༎
མིང་ཉིད་ཀྱིས་ནི་རང་བཞིན་དུ༎ འཛིན་ན་ད་ཀོ་སྐྱེ་བོ་འདི༎

འཕགས་མཆོག་རྣམས་ཀྱིས་ལེགས་བགྲོད་པའི༎ འཇུག་ངོགས་ཟླ་དང་བྲལ་གྱུར་པ༎
ཁྱོད་དགྱེས་གྱུར་པའི་ལམ་བཟང་དེར༎ ཐབས་གང་གིས་ནི་བཀྲི་བར་བྱ༎

རང་བཞིན་བཅོས་མིན་བལྟོས་མེད་དང༌༎ རྟེན་འབྲེལ་བལྟོས་དང་བཅོས་མ་གཉིས༎
ཇི་ལྟ་བུར་ན་གཞི་གཅིག་ལ༎ མི་འགལ་འདུ་བ་ཉིད་དུ་འགྱུར༎

དེ་ཕྱིར་བརྟེན་ནས་འབྱུང་བ་གང༌༎ རང་བཞིན་གྱིས་ནི་གདོད་མ་ནས༎
རྣམ་པར་དབེན་ཡང་དེར་སྣང་བས༎ འདི་ཀུན་སྒྱུ་མ་བཞིན་དུ་གསུངས༎

ཁྱོད་ཀྱིས་ཇི་ལྟར་བསྟན་པ་ལ༎ རྒོལ་བ་འགས་ཀྱང་ཆོས་མཐུན་དུ༎
གླགས་མི་རྙེད་པར་གསུངས་པ་ཡང༌༎ འདི་ཉིད་ཀྱིས་ནི་ལེགས་པར་ཁུམས༎

ཅི་སླད་ཅེ་ན་འདི་བཤད་པས༎ མཐོང་དང་མ་མཐོང་དངོས་པོ་ལ༎
སྒྲོ་འདོགས་པ་དང་སྐུར་འདེབས་ཀྱི༎ གོ་སྐབས་རིང་དུ་མཛད་ཕྱིར་རོ༎

ཁྱོད་ཀྱི་སྨྲ་བ་ཟླ་མེད་པར༎ མཐོང་བའི་རྒྱུ་མཚན་རྟེན་འབྱུང་གི༎
ལམ་འདི་ཉིད་ཀྱིས་གསུང་གཞན་ཡང༌༎ ཚད་མེད་གྱུར་པར་ངེས་པ་སྐྱེ༎

དོན་བཞིན་གཟིགས་ནས་ལེགས་གསུང་པ༎ ཁྱོད་ཀྱི་རྗེས་སུ་སློབ་པ་ལ༎
རྒུད་པ་ཐམས་ཅད་རིང་དུ་གྱུར༎ ཉེས་ཀུན་རྩ་བ་ལྡོག་ཕྱིར་རོ༎

ཁྱོད་ཀྱི་བསྟན་ལས་ཕྱིར་ཕྱོགས་པས༎ ཡུན་རིང་ངལ་བ་བསྟེན་བྱས་ཀྱང༌༎

ཕྱི་ཕྱིར་སྐྱོན་རྣམས་བོས་པ་བཞིན༎ བདག་ཏུ་ལྟ་བ་བརྟན་ཕྱིར་རོ༎
ཨེ་མའོ་མཁས་པས་འདི་གཉིས་ཀྱི༎ ཁྱད་པར་ཁོང་དུ་ཆུད་གྱུར་པ༎

དེ་ཚེ་རྐང་གི་ཁོང་ནས་ནི༎ ཁྱོད་ལ་ཅི་ཕྱིར་གུས་མི་འགྱུར༎
ཁྱོད་གསུང་དུ་མ་ཅི་ཞིག་སྨོས༎ ཆ་ཤས་རེ་ཡི་དོན་ཙམ་ལའང༌༎

འོལ་སྤྱི་ཙམ་གྱི་ངེས་རྙེད་པ༎ དེ་ལའང་མཆོག་གི་བདེ་བ་སྟེར༎
ཀྱི་ཧུད་བདག་བློ་རྨོངས་པས་བཅོམ༎ འདི་འདྲའི་ཡོན་ཏན་ཕུང་པོ་ལ༎

རིང་ནས་སྐྱབས་སུ་སོང་གྱུར་ཀྱང༌༎ ཡོན་ཏན་ཆ་ཙམ་མ་འཚལ་ཏོ༎
འོན་ཀྱང་འཆི་བདག་ཁར་ཕྱོགས་པའི༎ སྲོག་གི་རྒྱུན་ནི་མ་ནུབ་པར༎

ཁྱོད་ལ་ཅུང་ཟད་ཡིད་ཆེས་པ༎ འདི་ཡང་སྐལ་བ་བཟང་སྙམ་བགྱིད༎
སྟོན་པའི་ནང་ན་རྟེན་འབྲེལ་སྟོན་པ་དང༌༎ ཤེས་རབ་ནང་ན་རྟེན་འབྲེལ་ཤེས་པ་གཉིས༎

འཇིག་རྟེན་དག་ན་རྒྱལ་བའི་དབང་པོ་བཞིན༎ ཕུལ་བྱུང་ལེགས་པར་ཁྱོད་མཁྱེན་གཞན་གྱིས་མིན༎
ཁྱོད་ཀྱིས་ཇི་སྙེད་བཀའ་སྩལ་པ༎ རྟེན་འབྲེལ་ཉིད་ལས་བརྩམས་ཏེ་འཇུག༎

དེ་ཡང་མྱ་ངན་འདའ་ཕྱིར་ཏེ༎ ཞི་འགྱུར་མིན་མཛད་ཁྱོད་ལ་མེད༎
ཀྱེ་མའོ་ཁྱོད་ཀྱི་བསྟན་པ་ནི༎ གང་གི་རྣ་བའི་ལམ་སོང་བ༎

དེ་དག་ཐམས་ཅད་ཞི་འགྱུར་ཕྱིར༎ ཁྱོད་བསྟན་འཛིན་པར་སུ་མི་གུས༎
ཕས་རྒོལ་མཐའ་དག་འཇོམས་པ་དང༌༎ ལྟག་འོག་འགལ་འདུས་སྟོང་པ་དང༌༎

སྐྱེ་དགུའི་དོན་གཉིས་སྟེར་བྱེད་པ༎ ལུགས་འདིར་ཁོ་བོ་སྤྲོ་བ་འཕེལ༎
འདི་ཡི་ཕྱིར་དུ་ཁྱོད་ཀྱིས་ནི༎ ལ་ལར་སྐུ་དང་གཞན་དུ་སྲོག༎

སྡུག་པའི་གཉེན་དང་ལོངས་སྤྱོད་ཚོགས༎ གྲངས་མེད་བསྐལ་པར་ཡང་ཡང་བཏང༌༎
གང་གི་ཡོན་ཏན་མཐོང་བ་ཡིས༎ ལྕགས་ཀྱུས་ཉ་ལ་ཇི་བཞིན་དུ༎

ཉིད་ཀྱི་ཐུགས་དྲངས་ཆོས་དེ་ནི༎ ཁྱོད་ལས་མ་ཐོས་སྐལ་བ་ཞན༎
དེ་ཡི་མྱ་ངན་ཤུགས་ཀྱིས་ནི༎ སྡུག་པའི་བུ་ལ་མ་ཡི་ཡིད༎

རྗེས་སུ་སོང་བ་ཇི་བཞིན་དུ༎ བདག་གི་ཡིད་ནི་གཏོང་མི་བྱེད༎
འདི་ལའང་ཁྱོད་གསུང་བསམས་པ་ན༎ མཚན་དཔེའི་དཔལ་གྱིས་རབ་ཏུ་འབར༎

འོད་ཀྱི་དྲ་བས་ཡོངས་བསྐོར་བའི༎ སྟོན་པ་དེ་ཡི་ཚངས་དབྱངས་ཀྱིས༎
འདི་ནི་འདི་ལྟར་གསུང་སྙམ་དུ༎ ཡིད་ལ་ཐུབ་པའི་གཟུགས་བརྙན་ནི༎

ཤར་བ་ཙམ་ཡང་ཚ་བ་ཡིས༎ གདུངས་ལ་ཟླ་ཟེར་བཞིན་དུ་སྨན༎
དེ་ལྟར་རྨད་དུ་བྱུང་བ་ཡི༎ ལུགས་བཟང་དེ་ཡང་མི་མཁས་པའི༎

སྐྱེ་བོས་བལ་བ་ཛ་བཞིན་དུ༎ རྣམ་པ་ཀུན་ཏུ་འཛིངས་པར་བྱས༎
ཚུལ་འདི་མཐོང་ནས་བདག་གིས་ནི༎ འབད་པ་དུ་མས་མཁས་པ་ཡི༎

རྗེས་སུ་འབྲངས་ནས་ཁྱོད་ཀྱི་ནི༎ དགོངས་པ་ཡང་དང་ཡང་དུ་བཙལ༎
དེ་ཚེ་རང་གཞན་སྡེ་པ་ཡི༎ གཞུང་མང་དག་ལ་སྦྱངས་པ་ན༎

ཕྱི་ཕྱིར་ཐེ་ཚོམ་དྲ་བ་ཡིས༎ བདག་གི་ཡིད་ནི་ཀུན་དུ་གདུངས༎
ཁྱོད་ཀྱིས་བླ་མེད་ཐེག་པའི་ཚུལ༎ ཡོད་དང་མེད་པའི་མཐའ་སྤངས་ཏེ༎

ཇི་བཞིན་འགྲེལ་བར་ལུང་བསྟན་པ༎ ཀླུ་སྒྲུབ་གཞུང་ལུགས་ཀུན་དའི་ཚུལ༎
དྲི་མེད་མཁྱེན་པའི་དཀྱིལ་འཁོར་རྒྱས༎ གསུང་རབ་མཁའ་ལ་ཐོགས་མེད་རྒྱུ༎

མཐར་འཛིན་སྙིང་གི་མུན་པ་སེལ༎ ལོག་སྨྲའི་རྒྱུ་སྐར་ཟིལ་གནོན་པ༎
དཔལ་ལྡན་ཟླ་བའི་ལེགས་བཤད་ཀྱི༎ འོད་དཀར་ཕྲེང་བས་གསལ་བྱས་པ༎

བླ་མའི་དྲིན་གྱིས་མཐོང་བའི་ཚེ༎ བདག་གི་ཡིད་ཀྱིས་ངལ་གསོ་ཐོབ༎
མཛད་པ་ཀུན་ལས་གསུང་གི་ནི༎ མཛད་པ་མཆོག་ཡིན་དེ་ཡང་ནི༎

འདི་ཉིད་ཡིན་ཕྱིར་མཁས་པ་ཡིས༎ འདི་ལས་སངས་རྒྱས་རྗེས་དྲན་བྱོས༎
སྟོན་དེའི་རྗེས་སུ་རབ་ཏུ་བྱུང་གྱུར་ཏེ༎ རྒྱལ་བའི་གསུང་ལ་སྦྱངས་པ་མི་དམན་ཞིང༌༎

རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག༎ དྲང་སྲོང་ཆེན་པོ་དེ་ལ་དེ་ལྟར་གུས༎
སྟོན་པ་བླ་ན་མེད་པའི་བསྟན་པ་དང༌༎ འཇལ་བ་འདི་འདྲ་བླ་མའི་དྲིན་ཡིན་པས༎

དགེ་བ་འདི་ཡང་འགྲོ་བ་མ་ལུས་པ༎ བཤེས་གཉེན་དམ་པས་འཛིན་པའི་རྒྱུ་རུ་བསྔོ༎
ཕན་མཛད་དེ་ཡི་བསྟན་པའང་སྲིད་པའི་མཐར༎ ངན་རྟོག་རླུང་གིས་རྣམ་པར་མི་གཡོ་ཞིང༌༎

བསྟན་པའི་ངང་ཚུལ་ཤེས་ནས་སྟོན་པ་ལ༎ ཡིད་ཆེས་རྙེད་པས་རྟག་ཏུ་གང་བར་ཤོག༎
བརྟེན་ནས་འབྱུང་བའི་དེ་ཉིད་གསལ་མཛད་པ༎ ཐུབ་པའི་ལུགས་བཟང་སྐྱེ་བ་ཐམས་ཅད་དུ༎

ལུས་དང་སྲོག་ཀྱང་བཏང་ནས་འཛིན་པ་ལ༎ སྐད་ཅིག་ཙམ་ཡང་ལྷོད་པར་མ་གྱུར་ཅིག༎
འདྲེན་པ་མཆོག་དེས་དཀའ་བ་དཔག་མེད་ཀྱིས༎ ནན་ཏན་སྙིང་པོར་མཛད་ནས་བསྒྲུབས་པ་འདི༎

ཐབས་གང་ཞིག་གིས་འཕེལ་བར་འགྱུར་སྙམ་པའི༎ རྣམ་པར་དཔྱོད་པས་ཉིན་མཚན་འདའ་བར་ཤོག༎
ལྷག་བསམ་དག་པས་ཚུལ་དེར་བརྩོན་པ་ན༎ ཚངས་དང་དབང་པོ་འཇིག་རྟེན་སྐྱོང་བ་དང༌༎
ལེགས་ལྡན་ནག་པོ་ལ་སོགས་སྲུང་མས་ཀྱང༌༎ གཡེལ་བ་མེད་པར་རྟག་ཏུ་གྲོགས་བྱེད་ཤོག༎ ༎


དེ་བཞིན་ཤེགས་པ་ཁྱེད་སྐུ་ཅི་འདྲ་དང་༎ འཁོར་དང་སྐུ་ཚེའི་ཚད་དང་ཞིང་ཁམས་དང་༎
ཁྱོད་ཀྱི་མཚན་མཆོག་མཟང་པོ་ཅི་འདྲ་བ༎ དེ་འདྲ་ཁོ་ནར་བདག་སོགས་འགྱུར་བར་ཤོག༎

སྟོན་པ་འཇིག་རྟེན་ཁམས་སུ་བྱོན་པ་དང་༎ བསྟན་པ་ཉི་འོད་བཞིན་དུ་གསལ་བ་དང་༎
བསྟན་འཛིན་ཕུ་ནུ་བཞིན་དུ་མཐུན་པ་ཡིས༎ བསྟན་པ་ཡུན་རིང་གནས་པའི་བཀྲ་ཤིས་ཤོག༎ ༎


ཅེས་པ་འདི་ནི་རྗེ་ཙོང་ཁ་པ་བློ་བཟང་གྲགས་པས་མཛད་པའོ༎ ༎

བསྔོ་བ།
सभ सर्व मंगलम
སབྷ། སརྦ། མངྒ་ལཾ།
साधु साधु साधु
དེ་དེ་བཞིན་ནོ། དེ་དེ་བཞིན་ནོ། དེ་དེ་བཞིན་ནོ།

For corrections or suggestions contact tsering.karma@gmail.com
I encourage you to download these pages for OFF line study; Explorer: File Save As